HAGGAI

Thupatna

Hi Haggai Laibu sia B.C 520 lai a, kamsangpa Haggai tungtawn in TOPA thupuak tomno a kingawmtua laibu ahi hi. Mihingte saltanna pan hong cia kik zo in, Jerusalem khua ah kumtawmvei sung teang zo a, ahihang Biakinn sia a zancip sa in omlai hi. A lampuite ii Biakinn a sak kik natu thupiakna, a kithaksua le a kithiansua mihingte ii mai sangah maa vanna le kilemna a om natu TOPA in kamciam pia hi.

A kihel Thulute
Biakinn sak kik natu thu piakna 1:1-15
Heenepna le lametna thupuakte 2:1-23

Haggai 1

TOPA in Biakinn Sak kik natu Sawl

1Darius in Persia ngam uklian a sep a kum niina kum, a tha luk tha ni masa bel ni in kamsangpa Haggai tungtawn in, TOPA in thu son hi. Shealtiel tapa Judah ngam uk Zerubbabel atu le Jehozadak ii tapa Thiampi Saang Joshua atu thupuak ahi hi. *

2Vaanglianbel TOPA in Haggai tungah, “Hi mihingte in tu hun sia Biakinn sak kik natu hunpha hi ngawl hi, ci uh hi,” ci hi. 3Taciang TOPA in kamsangpa Haggai tungtawn in hi thu teng mihingte tungah pia hi: 4“Ka mite awng, ka Biakinn a zancip sa in a om laitakin pha tak a kisa innte sungah banghang note teang tu nu ziam? 5Note tungah bang thupiang cisia mu ngawl nu ziam? 6Thaicii tam mama na tu uh a, ahizong an tawm bek na la uh hi. Anneak tu na nei uh a, ahizong na khamkhop tu na nei bua uh hi. Zu neak tu na nei uh a, ahizong na kham tham tu na nei bua uh hi. Puansilh na nei uh a, ahizong a lum tham tu na nei bua uh hi. Taciang naseam khat in a nuntak khom natu thalaw zo ngawl hi. 7Hisia banghangin piang ci in na he uh ziam? 8Tu in mual tungah kaato tavun a, inn thingte la vun, taciang Biakinn sa kik vun; taciang kei ka lungkim tu a, a kilawm bangin kei hong kibia tu hi.

9“Anlaak tu tam mama na lamen uh a, ahizong tawmno bek piang hi. Taciang na an uhte na sungkhum uh ciang kong seamkeak sak hi. Banghang tabang vawt khi ziam? Banghangziam cile note mi sim in ama inn tu sa in a komlaak laitakin ka Biakinn sia a zancip sa in om hi. 10Tua hu in ngua zu ngawl a, bangma po thei ngawl hi. 11Leitangh tung, mualte tung, anciinna lo sung, sapit huansung, olive ciinna lo, an namcin kiciinna tung, mihingte tung, ngannote tung, na ciin sa theampo tungah nguatui kong hang sak hi,” ci hi.

Mihingte in TOPA Thupiak Ni

12Taciang Zerubbabel, Joshua le Babylonia ngam saltanna pan hong cia kik theampo in TOPA a Pathian sawl bangin vawt uh hi. Amate lau uh a, TOPA ii kamtaipa, kamsang Haggai thu ni uh hi. 13Taciang Haggai in TOPA thupuakte mihingte tungah pia hi. “Note taw kei kong omkhawm tu hi, ci in kong kamciam hi,” ci hi. 14TOPA in mihing theampo tungah Biakinn sak natu thu mop hi; tua mihingte sia Judah ngam ukpa Zerubbabel, Thiampi Saang Joshua, le saltanna pan hong cia kik mite theampo ahi hi. Amate in Vaanglianbel TOPA a Pathian Biakinn ah nasep hong kipan uh hi. 15A hun sia Darius ngam uklian pa maan zawk kum nii kum, tha luk tha, ni kul le ni li ni ahi hi.

⇑

[Remove Footnotes]