HOSEA

Thupatna

BC 721 kum Samaria khua bo maa ngim nga hunte sung, Israel saksang ngamah Kamsang pa Amos zawkciang kamsang pa Hosea in thuhil hi. Ama thinbot bel thu in a mite ii Pathian tungah a thumaan ngawlna le milimte a biakna huvau ahi hi. A thumaan ngawl numei taw tuasiat kitenna lim zanghin hi thumaan ngawlnate Hosea in hangsan takin lak hi. A zi Gomer in ama tungah a thumaan ngawl bang keakin Pathian ii mite in TOPA nusia uh hi. Hi thu hu in Israel tungah thukhenna tung tu hi. Ahihang a tawpna ah Pathian ii a mite a tawntung a itna ma kho kenkon tu a, ama in Israel a mite nga kik in a kipee-aw nate zongh a ngei bang sua kik tu hi. Hi ki itna thu sia hi bang kamthum taw kison hi. “Israel awng, nang bangbangin hong thasua thei tu khi ziam? Nang bangbangin hong nusia thei tu khi ziam? Ka lungtang in tabangin hong ngamta sak ngawl tu hi. Nang kong itna sia nasia lei lalawm hi!” (11:8)

A kihel Thulute
Hosea ii zi neina le innkuan vai 1:1-3:5
Israel langpanna thupuakte 4:1-13:16
Kisii kikna le kamciam piakna thupuak 14:1-9

Hosea 1

1Hisia in Kumpi Uzziah, Jotham, Ahaz le Hezekiah te Judah ngamah kumpi in a maan hun le Jehoash tapa Jeroboam Israel kumpi in a maan hun a, Beeri tapa Hosea tungah TOPA ii piak thupuak ahi hi. *

Hosea ii Zi le Tate

2TOPA in Hosea tungtawn a, Israel a paupui phitbel hunin Hosea tungah, “Pai in a, zi nei in; na zi sia thumaan ngawl tu a, na tate ama banglian ma hi tu hi. Tasia bangma ka mite in kei hong nusia in, thumaan ngawl suak uh hi,” ci hi.

3Tabangin Hosea in Diblaim tanu Gomer kici numei khat tenpui hi. Amate in taciil tapa khat a nei zawkciang, 4TOPA in Hosea tungah, “A min ‘Jezreel’ phuakin, banghangziam cile Israel kumpipa ii pu Jehu ii Jezreel ah tual a thate hu in hai ngawlin Israel kumpipa daan ka pia tu hi. Jehu suan le paalte ii kumpi khang ka bo sak tu hi. * 5Tua hun ciang Jezreel Kuam ah Israel ii ngalkap thahatna ka susia tu hi,” ci hi.

6Gomer in a niina ta khat nei kik a, numei ahi hi. TOPA in Hosea munah, “A min ‘it ngawl a ci nopna’ (Lo-Ruhamah) phuak in, banghangziam cile Israel mite tungah ka itna ka lak nawn batu a a mawna ka mai sak nawn batu hi. 7Ahihang Judah mite tungah ka itna ka lak tu hi, Keima, amate Pathian TOPA in amate ka hun tu hi, ahihang ngal kisimna— namsau thal le thaltang, siphu le siphu ngalkapte ka zangh batu hi,” ci hi.

8Gomer in a tanuno noai a ten sak zawkciang ama nau paai kik a, tapa dang khat nei hi. 9TOPA in Hosea mun ah, “Na tapa min ‘Ka mi hi ngawl’ ( Lo-Ammi ) ci in phuak in, banghangziam cile Israel mite sia ka mi hi ngawl a, kei sia amate Pathian ka hi bua hi,” ci hi.

Israel Kipua kik tu

10Israel mite sia a kisim zo ngawl, a kitee zo ngawl tuipi sen bangin tam tu hi. Tu in Pathian in amate mun ah, “Note sia ka mite hi ngawl nu hi,” ci hi, ahihang ama in amate tungah, “Note sia a nungta Pathian tate na hi uh hi!” a ci ni hong theng tu hi. * 11Judah mite le Israel mite kingawm kik tu hi. Amate in amate atu lampui khat teal tu a, khatvei ma amate sia a ngam sungah khangto in nuamsa kik tu uh hi. Hi hi, Jezreel ii ni sia ni thupi ni khat hi tu hi!

⇑

[Remove Footnotes]