JEREMIAH

Thupatna

Kamsang Jeremiah sia B.C kum a zasali bo kuan sang le B.C kum a zaluk kipat sang kilaklaw sungah nungta hi.

Ama ii khua ngei hial ma a nasep hun sungin amate ii milim biakna le amate ii mawna hangin minamte tungah tuasiatna lian a thet tusia ama in Pathian mite tungah kidop natu thu son khol hi. Jerusalem sia Babylon Kumpipa, Nebuchadnezzar khutsung a thet tu thu, a khuapi le a Biakinn a kisukcip natu thu, Judah kumpipa le a mite tam mama Babylon ah sal a tan natu thu a son kholnate tung takpi hi ci sia ama ii nuntak sungah mu hi. Ngamdang ah a saltanna panin a khak belin a mite a heak kik natu thu le minam nam khat a suak kik tu thute zongh ama in son khol hi.

Jeremiah thubu sia a nuai a bangin kikhen hi: 1) Jeremiah a kisamna. 2) Josiah, Jehoiakim, Jehoiachin le Zedekiahte maan hunlai in Judah mite le Judah mite a ukte tungah Pathian ii a son thute. 3) Jeremiah ii thuzeakpa Baruch ii tepteena sung pan a thute, Jeremiah ii nuntak hun lai a thupiang thupite le son kholna tatuamte. 4) Ngamdang minam tatuamte taw kisai TOPA ii son thute. 5) A nung ah a kibelap tangthute, Jerusalem khua bona le Babylon ah saltanna thute ahi hi.

Jeremiah sia a mite a it mama le thu le la sang a phawk vilvel pasal khat hi a, a mite thu a khenna son tu a uuk ngawl het pa khat ahi hi. Pathian in kamsang naseam khat tu in a sapna hangin ngimna a thuakna thute thinbot takin a lai atna mun tam mama ah son hi. Topa kammal sia a thin sungah meikam sa bang hi a son ngawlin om thei ngawl hi.

Jeremiah thubu sung pan a thupi bel kammal pawlkhat sia Jeremiah ii ngimngana a thuak hunte a bo zawk ciang thuciamna thak khat a pian tu hun lak hi, tasia sia amate a hil tu sya kul ngawlin Pathian ii mite in ciamtee nginge tu uh hi, banghangziam cile amate ii lungtang tungah ki at tu hi. (31:31-34)

A kihel Thulute
Jeremiah a kisapna 1:1-19
Josiah, Jehoiakim, Jehoiachin le Zedekiahte uk hun sung thu son kholna 2:1-25:38
Jeremiah ii nuntak sung thupiangte 26:1-45:5
Minam dangte siat natu son kholna 46:1-51:64
Jerusalem khua bona 52:1-34

Jeremiah 1

1Hi laibu sia Benjamin ngam sunga om Anathoth khua a thiampite khat ahi, Hilkiah ii tapa Jeremiah ii thu sonte a kiteptee na ahi hi. 2Amon ii tapa Josiah sia Judah kumpi a sua zawk kum sawm le kum thum kum in TOPA in Jeremiah paupui hi. * 3Josiah ii tapa Jehoiakim kumpi a sua ciang TOPA in Jeremiah paupui leleau hi. Tasia zawkciang, Josiah ii tapa Zedekiah kumpi a sua zawk kum sawm le kum khat dong TOPA in ama tam vei mama paupui hi. Tua kum a tha nga tha ciang Jerusalem mite ngamdang ah sal tang uh hi. *

Jeremiah A kisapna

4TOPA in kei tungah, 5“Nuntakna kong piak ma in kong teal zo a, na nu sung pan na sua ma in minamte tungah kamsang khat tu in kong teal hi,” hong ci hi.

6“Vaanglianpipa TOPA awng, kei thuson thiam bong; moi lei lai ing,” ci in ka zo kik hi.

7Ahihang TOPA in kei tungah, “Kei ka moi lei hi ci heak in, kong sawl bangin mite kungah pai in, son tu a kong thupiak theampo amate tungah son siat in. 8Amate kiita heak in, banghangziam cile Keima in nangma hong dal tu in kong ompui tu hi, TOPA ahi, Keima in kong ci zo hi!” hong ci hi.

9Taciang TOPA in a khut hong thaakin, ka mukte hong tham a, taciang kei tungah, “Ngai in, na pau tu kammalte na kam sungah ka koi zo hi. 10Ngam theampo le kumpi theampote a longhkeak tu le a kaikeak tu, a susia tu le a lawnthal tu, a sa tu le a suan tu in thu neina tuni in nang kong pia hi” hong ci hi.

Mu kholna Nam nii

11TOPA in, “Jeremiah awng, bang na mu ziam?” ci in kei hong dongh hi. Keima in, “Almond thingbaak khat ka mu hi,” ci in ka zo kik hi.

12TOPA in, “Maan ni hi, Kei zongh ka thusonte a tangtung tu ngak nginge khi hi,” ci hi.

13Tua zawkciang TOPA in, “A dang bang na mu ziam?” ci in kei hong dongh leleau hi.

Keima in, “Sak sangah tuibeal a so, hi sangah hong puk dektak khat ka mu hi,” ci in ka zo kik hi.

14TOPA in kei tungah, “Hi ngam sungah a teang mihingte theampo tungah saksang panin tuiso bangin siatna hong theng tu hi, 15banghangziam cile sak sangah a teang minamte theampo hong pai tu in ka sam hi. Amate ii kumpite in a kumpi tokhumte uh sia Jerusalem kongpite ah ahizong, luphung kiimkot ah ahizong, Judah khuapi dangte ii kiimkot ah ahizong phut tu uh hi. 16Keima in ka mihingte daan ka pia tu hi. Banghangziam cile amate in khialna vawt zo uh hi; amate in kei hong nusia zo uh a, pathian dangte tungah biakpiakna pia in, milim vawtin bia uh hi. 17Kithoai in, Jeremiah awng; pai tan a son tu a kong sawl theampo amate son tan. Tu in amate kiita heak in, na kiita ahile amate taw na omkhop ciang kong kiita sak va-ial tu hi. 18-19Ngai in, Jeremiah awng! Hi ngam sungah om mihing theampo– Judah kumpite, uliante, thiampite le mipite in nang hong langpan tu uh hi. Ahihang tuni in amate na nalh zawk natu in thahatna kong pia tu hi; nangma in kulh taw a ki uum khuapi khat bang, thik khuam khat bang le taungo luphung khat bang na hi tu hi. Amate in nang hong zo ngawl tu uh hi, banghangziam cile nang hong dal tu in kong ompui tu hi, TOPA Keima in ka ci zo hi,” hong ci hi.

⇑

[Remove Footnotes]