JOB

Thupatna

Job Laibu sia lalcipna a thuak mihing pha khat ii tangthu ahi hi. Ama in a tate theampo le a neisa theampo sumcip a, taciang a kiihuai natna khat vei hi. Tua zawkciang Job le a lawmte in hi khuangai tuasiatna te bangbangin saang ziam, ci thu lai at pa in langui thum taw lak hi. A khak bel ciang, ama ii mihing taw a kizopna thu kikup belin a kinei Pathian Ama mama Job tungah kilangh hi.

Job ii lawmte in Job ii thuakna sia biakna paizia ngeina taw a khiakna son hi. Amate in Pathian in miphate thupha pia a, misiate daan thuak sak tawntung ahikom, Job ii thuaknate ama ii khialna hang bek hi thei hi ci in ngaisun uh hi. Ahihang Job in hi bang vazeangin hi sa ngawl hi, banghangziam cile ama sia mihing pha le thutang khat ahikom, tabang a nasia mama daan piaknate a thuak tu kilawm ngawl hi. Pathian in ama banghang tuasiatna nasia takin thuak sak ziam cisia ama in tel zo ngawl ahikom, ama in hangsan takin Pathian thato hi, Job in a upna thasua ngawl hi, ahihang Pathian mai ah thutang pa khat a hina a kitel natu le mihing pha khat a hina, a minphatnate nga kik natu ama in thangai hi.

Pathian in Job ii doknate zo kik ngawl hi. Ahizong Pathian in Job ii upnate a zo kikna in Ama Pathian ii vaangletna le a ciimna thute a kimu sak thei tu la kammalte pia hi. Tasia ciang Job in Pathian ii ciimna le letna sia nasia hi ci in saang thei in, thin uukna kammal a zakte kisiik kik hi.

Thukhupna sungah Job sia nidang a dinmun ngei bang kisuak sak kik a, nidang sang zong a nop sak zawknate kiciamtee hi. Job ii thuaknate ii a khiakna a telkhial hu in Pathian in Job ii lawmte tei hi. Pathian sia a pu a pate biakna ii lakna sangin lian zaw hi ci sia Job bekma in telthiang hi.

A kihel Thulute
Thu phuanna 1:1-2;13
Job le a lawmte 3:1-31:40
   a. Job ii phunna 3:1-26
   b. A khat vei kipaupuina 4:1-14:22
   c. A nii vei kipaupuina 15:1-21:34
   d. A thum vei kipaupuina 22:1-27:23
   e. Ciimna patakna 28:1-28
   f. Job ii a khakbel pauna 29:1-31:40
Elihu ii pauna 32:1-37:24
Topa in Job kammal zo kik 38:1-42:6
Thukhupna 42:7-17

Job 1

Satan in Job Ze-et

1Uz ngamah a teang Job kici mi khat om hi. Ama in Pathian bia a, Pathian tungah thumaan hi. Ama mihing pha khat hi a, siatna minpiang vawt ngawl tu in kidawm hi. 2Ama in tapa sali le tanu thum nei a, 3taciang tuu tulsali, kalauh tulthum, khui tulkhat le laa za-nga nei hi. Ama in naseam tam mama zongh nei in, Nisuana ngam sungah a hau bel ahi hi.

4Job ii tapate in a ban a banin poaikhaam a, tua poai ah a suapui dangte theampo pai uh hi. Amate in a suapui numeite thum zongh a kihel tu in sam tawntung uh hi. 5Poaikhaam khuavak nisim in Job sia zingtuung in tho a, a tapate a thiansua natu in a tapate khat sim atu sangaw biakpiakna vawt hi. Ama in hi bangin a vawt tawntung sia a tapate khat po in tupkholna om ngawlin Pathian zawngsak in khialna khat po a nei tha a om le ci in, a ngaisut hang ahi hi.

6TOPA mai ah vantung mite a kilangh tu ni a tun ciang tuate sungah Satan kihel hi. * 7TOPA in Satan tungah, “Bang teng vawt ni ziam?” ci in dongh hi.

Satan in, “Mun khat pan mun khat ah pai in simleitung kiimkot in ka vak kakoai hi,” ci in zo hi.

8TOPA in, “Ka naseampa Job na phawk tha ziam? Leitung bup ah ama bangin a thumaan le a pha kuama om ngawl hi. Ama in kei hong bia a, a sia a vawt ngawl natu kidawm hi,” ci hi.

9Satan in, “Hong biakna tungtaang pan phattuamna nga ngawl hile Job in nang hong bia thong tu ziam? * 10Ama le a innkuan le a neisa theampo nangma in na huuk sak tawntung hi. A sep theampo thupha na pia a, ngambup dim dongin ngannote na pia hi. 11Ahihang tu in a neisa theampo nangma in laak sak ci tawng na maitang pan hong haamsiat tu hi!” ci in zo hi.

12TOPA in Satan tungah, “Pha hi, a neisa theampo tungah thu nei ni hi, ahihang Job ii pumpi susia thei ngawl tu ni hi,” ci hi. Tasia ciang Satan in nusia hi.

Job ii Tate le A hauna Ki lalcip sak

13Ni khat ni Job ii tate a upabel pa ii inn ah poai a khaam laitakin, 14Job kungah kamtai khat hong tai hi. Ama in, “Kote lo sungah khuikap taw naseam in om a, laate lohui ngan thana ah taa uh hi. 15Thakhat thu in Sabeante in hong sim a, nganno teng ngu siat hi. Amate in keima simngawl na naseamte a vekpi in thatlum uh hi. Nang tungah thu hong ko tu in keima bekma ka suakta hi,” ci hi.

16A thu ko zongh man ngawl lai in naseam dang khat hong theng a, ama in, “Keak kia in na tuute le a cingte deanglum siat hi. Nang tungah thu hong ko tu in keima bekma ka suakta hi,” ci hi.

17A thu son man ngawl lai in naseam dang khat hong theng a, ama in, “Chaldean ngal nguk seamte pawl thum in hong sim a, na kalauh theampo ciapui in na naseamte keima sim ngawl thatlum siat hi. Nang tungah thu ko tu in kei bekma suakta khi hi,” ci hi.

18A thu son zongh man tak ngawl lai in naseam dang khat hong theng a, ama in, “Na tate na tapa ulianbel sia ii inn ah poai khaam in a om laitak, 19senneal ngam sang pan vuipi suangval hong va hi. Tua vuipi suangval in a inn seamkeak a, amate theampo thi sak siat hi. Na tungah thu ko tu in keima bekma suakta khi hi,” ci hi.

20Tasia ciang Job dingto a, khuangai in a puansilh teng baltham hi. A sam meet a, lei ah bokcip hi. 21Ama in, “Ka pian lai in ka pumnguak in ka suak a, ka pumnguak in ka thi tu hi. TOPA in hong pia a, tu in TOPA in la kik hi. Ama min kipok tahen!” ci hi.

22Ama tungah hi bangin thu piang napi Job in Pathian mawsiat ngawl a Pathian tungah khial ngawl hi.

⇑

[Remove Footnotes]