JOSHUA

Thupatna

Joshua Laibu sia Moses za laihpa Joshua ii lampuina taw Israel mite ii Canaan ngam a simna thu ahi hi. Hi laibu sungah a teptee huai thupiang teng pan, Jordan ngun a kantanna, Jericho khua a kizawthalna, Ai khua a kisimna le Pathian le a mite a thak in a kiciamna thute ahi hi. Hi laibu sungah a kihe bel kammal sia “Tuni in akua ii na seam tu nu ziam teal vun... kei le ka innkuanpui te ka hi uh le TOPA na ka seam tu uh hi,” ci thu hi.(24:15)

A kihel Thulute
Canaan ngam zawna 1:1-12:24
Ngam hawmthapna 13:1-21:45
   a. Jordan ngun ii nisuana sang leitangh 13:1-33
   b. Jordan ngun ii nitumna sang leitangh 14:1-19:51
   c. Buhna khuapite 20:1-9
   d. Levite khuapite 21:1-45
Nisuana sangah a teang minamte amate ngam ah cia kik 22:1-34
Joshua ii a khakbel vaithakna kam 23:1-16
Shechem ah kamciamna thaksua sak kikna 24:1-33

Joshua 1

1TOPA ii naseam Moses thi zawkciang, Moses a hu Nun ii tapa Joshua ii tungah TOPA in paupui hi. 2Ama in hi bangin ci hi, “Ka naseam pa Moses thi zo hi. Tu in kithoai in, nang le Israel mite theampo awng, amate tungah ka piak sa ngam lua tu in Jordan ngun kantan vun. 3Moses tungah ka ci sa bangma in nang le ka mite theampo sia na sii na leitangh a buppi in kong pia zo hi. 4Na ngamngi tu uh sia thangsang senneal ngam panin Lebanon Mualpite dong kithung to tu hi; nisuana sang Ngunpi lian Euphrates pan, Hitte ngam kantan, nitumna sang Mediterranian Tuipi dong hi tu hi. 5Joshua awng, na nuntak lai teng nang sia kuama in hong zo zo ngawl tu hi. Moses ka ompui bangma in nang kong ompui tu hi. Nang taw a tawntung in kong omkhawm tu hi; nang kong nusia batu hi. * * 6Thin takkha in a kimuang in, banghangziam cile a pute a pate tungah ka kamciam sa leitangh te a lua uh ciang hi mihingte ii lampui pa na hi tu hi. * 7Thin takkha in a kimuang in, taciang ka naseampa Moses ii hong piak thukham a buppi in na ni vun. Tuate khat zongh na ngaingon heak vun, tua hi le na paina theampo ah zawna na nga tu hi. 8Na biakpiakna sung theampo ah Thukham Laibu sia sim vateei tu nu hi. Sun taw zan taw tua laibu sung a thute kantel in a ki at theampo na ni hamtang vun. Tasia ciang na khangto tu a, zawna na nga tu hi. 9Thin takkhana le kimuanna nei tu in kong thupiak sia ciamtee in. Lau heak in a, thinkiam heak in, banghangziam cile Kei, TOPA na Pathian sia na paina theampo ah nang taw hong omkhawm khi hi.”

Joshua in A mite Thupia

10Tua zawkciang Joshua sia lampuite ii ngiaphual sungah 11pai kakoai in mihingte tungah hi bangin thupia in sawl hi. “Nguai an pawlkhat taw kinging vun, banghangziam cile tu zo ni thum sung, TOPA na Pathian ii hong piak leitanghte lua tu in Jordan Ngun kantan in na pai tu uh hi.”

12Reuben le Gad ii suan le Manasseh ii suan khen langte tungah Joshua in, * 13“TOPA ii naseam pa Moses in TOPA na Pathian in Jordan ngun ii nisuana leitangh sia na inn na lo tu in hong pia tu hi a ci teng ciamtee vun. 14Na zite na tate uh le na ngannote uh sia hi lai munah taang zii tu a, ahihang na ngalkapte uh ngalsim tu in a kinging sa te sia Israel mipuite mai ah amate hu tu in ngun kantan in pai tu hi. 15TOPA na Pathian ii amate a piak sa Jordan ii nitumna sang ngam teng a lua uh mateng tabangin ngamta tu nu hi. Ama in Israel minam a vekpi in ngam muanna a piak zawkciang TOPA naseam pa Moses ii no hong piak Jordan ii nisuana ngamah a teang tu in nong cia kik tu uh hi.”

16Amate in, “Nong sawl theampo ka vawt tu a, nong puakna mun theampo ah ka pai tu hi. 17Moses ii thu ka nit uh bangma na thu hong ni tu khu hi. Moses a ompui bang keak ma in Pathian sia nang taw hong omkhawm po tahen! 18Na thu neina hong thusim ngawlte le na thupiakna hong ni ngawlte ki thatlum tu hi. Takkha in kimuang po in,” ci in zo kik uh hi.

⇑

[Remove Footnotes]