THUKHENTE

(Judges)

Thupatna

Thukhente Laibu sia Canaan ngam a laak le kumpi a kikoi hun kilaklaw Israel te ii thukham sel in a om sungah tangthute ahi hi. Hi tangthute sia minam sunga ngalhangsante ii zawna thute hi a, "thukhen" a kici ngalhang ngalkap lampuite veu hi zaw a, thuson zum a thukhente hi ngawl hi. Amate sung pan a kitel thiambel khat sia Samson hi a, ama ii ngamtatna sia a khaan lian 13 - 16 sungah kiciamtee hi.

Hi laibu ii a hil thu sia, Israel ii luhaina sia thu maanna taw Pathian a suan ciang hi a, thumaan ngawlna in lalna veu ah then tawntung ci thu hi. Ahihang hisia bek hi ngawl lai hi; minam bup in Pathian tungah a thumaan ngawl uh ciang lalna hong tung, hi kale a mite in kisiik in ama sang a ngat kik ciangin Pathian sia a mite hun tu in kinging tawntung hi.

A kihel Thulute
Joshua ii thi dong thupiang teng 1:1-2:10
Israelte ii thukhente 2:11-16:31
A piang thu dadangte 17:1-21:25

Thukhente 1

Judah le Simeon Minamte in Adonibezek Pummat

1Joshua ii thi zawkciang Israelte in TOPA dongh a, “Akua namte in Canaan te pai in, sim masa tu khu ziam?” ci uh hi.

2TOPA in zo kik a, “Judah namte pai masa tu hi. Amate tungah ngam uk thu neina pia khi hi.”

3Judah mite in Simeon mite tungah, “Ei hong kipia ngam sungah ko taw hong pai tavun, Canaante ih sim khawm tu hi. Tua zawkciang no hong kipia ngamte sia ko zongh kong sim pui tu uh hi,” ci hi. Tua ahikom Simeon namte le 4Judah namte sia ngalsim tu in kuan khawm hi. TOPA in amate sia Canaan mite le Periz mite tungah zawna pia a, amate in Bezek ah ngalte tulsawm zo uh hi. 5Amate in tua munah Adonibezek mu uh a ama sim uh hi. 6Ama tai hi, ahihang amate in del a, pummat hi, amate in a khutpite le a peangpite tan sak uh hi. 7Adonibezek in, “Kumpi sawmsali, a khutpite le a peangpite a kitante in ka sabuai nuai ah antaakte tawm uh hi. Amate tung a ka vawt teng Pathian in kei tungah hong thuh hi,” ci hi. Jerusalem ah ama kipaipui a, tua munah thi hi.

Judah namte in Jerusalem le Hebron La

8Judah nam sunga mite in Jerusalem simin la uh hi. A mihingte that uh a, a khuapi haltham hi. 9Hisia zawkciang amate in mualtung ngam a teang Canaan mite le mualpeang a teangte, thangsang ngam kona a omte sim uh hi. 10Amate in, Kiriath Arba a kici ngei Hebron khuapi kiim a teang Canaan mite kuan in sim uh hi. Tua munah amate in Sheshai, Ahiman le Talmai be le phungte zo uh hi.

Othniel in Debir Khuapi Zothal

(Joshua 15:13-19)

11Tua mun panin Judah mite tua hun lai in Kiriath Sepher kinaa Debir khuapi sim tu in kuan uh hi. 12Amate sung pan khat ahi Caleb in, Kiriath Sepher a la zo sia ka tanu Achsah a tenpui tu in pia tu khi hi,” ci hi. 13Caleb ii naupa Kenaz ii tapa Othniel in khuapi la zo hi, tua ahikom Caleb in a tanu Achsah sia a tenpui tu in pia hi. 14Mo kiten ni in Othniel in ama ii munah, na pa ii tung pan lo khat ngen in sawl hi. Ama in a laa tung pan hong tuaksuk a, tasia ciang Caleb in bang dei ni ziam ci in dongh hi. 15“Tuicing pawl khat dei khi hi, leitangh nong piak sia mun kona hi thong hi,” ci hi. Tua ahikom Caleb in cik tungnung le cik nuainung pia hi.

Judah namte le Benjamin namte ii Zawnate

16Moses ii sungh pa ii suan Ken mite in Judah mite taw kopin Jericho, palm thing namte pona, mualkolna ngam Judah ii thangsang zuan uh hi. Amalek te taw tua munah teang khawm uh hi. 17Judah nam mite le Simeon mite kuan khawm in Zephath khuapi a teang Canaan mite zo uh hi. Amate in khuapi tomlaw a, susia in, Hormah ci in min phua uh hi. 18-19TOPA in Judah mite hu a, amate in a neisa tu in mualtung ngam la uh hi. Ahihang amate in Gaza, Ashkelon, ahibale Ekron le a kiim a ngamte a la bua uh hi. Hi mite tuipi hui a, a teangte in thik ngalleang nei ahikom Judah mite in a nawtkeak zo bua uh hi. 20Moses ii thupiak bangin, Hebron sia Caleb kipia a, ama in khuapi sung pan Anak ii suan minam thumte notkeak hi. * 21Ahihang Benjamin mite in Jerusalem khua a teang Jebuste notkeak ngawl ahikom Jebus mite sia Benjamin mite taw tua hun a kipan teang khawm hi. *

Ephraim namte le Manasseh namte in Bethel Suan

22-23Tua hun lai in Ephraim namte le Manasseh namte pai in, Luz a kici Bethel khua sim uh hi. TOPA in amate hu hi. Amate khuapi sungah thukan kute pai sak uh a, 24pasal khat khua pan paikhia tu kithoai a mu uh hi. “Khuapi sung tumna hong hil le te bangma hong law ngawl tu khu hi,” ci uh hi. 25Tua ahikom ama in lak a, tasia ciang Ephraim le Manasseh namte in tua pasal pa le a innkuanpui teng simngawl mon siat uh hi. 26Ama in tua zawkciang Hit te ngamah pai in, khuapi khat tua munah sa hi, Luz ci in a min phuak a, tu dong ma tua min taw kinaa lai hi.

Israelte ii Nawkeak ngawl Mite

27Manasseh minamte in a nuai a khuapi teng, Beth Shan, Taanach, Dor, Ibleam, Megiddo, le a nai a khuapinote sung pan mihingte a notkhia bua uh hi; Canaan mite tua munah teang suak uh hi. * 28Israel mite a thahat va-ial ciang amate atu na sep sak tu in sawl uh a, ahihang amate sia a bengkeak siat bua uh hi.

29Ephraim namte in Gezer khuapi panin Canaan mite notkeak ngawl ahikom Canaan mite sia amate taw teangkhawm suak uh hi. *

30Zebulun namte in Kitron khuapi le Nahalal khuapi sung panin Canaan mite a notkhe bua uh hi, tua ahikom Canaan mite sia amate taw teangkhawm top a, amate ii na sep sak tu in sawl uh hi.

31Asher namte in Canaan mite sia a nuai a khuapite Acco, Sidon, Ahlab, Achzib, Helbah, Aphek, le Rehob panin a notkeak bua uh hi: 32Asher namte in Canaan tualsuak mite sia notkhe ngawl ahikom amate taw teangkhawm hi.

33Naphtali namte in Beth Shemesh te le Bethanath a teangte a notkeak bua uh hi. Naphtali namte in Canaan tualsuakte taw teangkhawm uh hi, ahizong amate ii na sep sak tu in sawl uh hi.

34Amor mite in Dan namte sia mualtung ngam ah nolh to uh a zaanglei ah hong tuaksuk tu khaam uh hi. 35Amor mite in Aijalon, Shaalbim, le Heres Mualvum ah teangtan a, Ephraim le Manasseh te in amate uk in, zawthawk thu taw sawltak in zangh hi.

36Sela ii sak sangah Edom te ii ngamngi sia Akrabbim Mualciangh kantan in pai hi.

⇑

[Remove Footnotes]