THIAMPITE

(Leviticus)

Thupatna

Thiampi Laibu sungah taangh lai Israelte biakna le biakna poai vawt ciang zui tu ngeina le a seam tu thiampite ii zui tu ngeinate ki at hi.

Hi Laibu ii a thubulphu in Pathian thianthona le Israelte ii a thiangtho Pathian le a mihingte kizopna a tatsat ngawl natu in, Pathian a biak natu ziate ahi hi.

Hi Laibu sung pan a ki hebel kammal in, 19:18 sungah om a, Jesu ii thupiak a lian niina, “Nangma le nangma na ki it bangin na innpaamte it in,” ci thu ahi hi.

A kihel Thulute
Piakna le sangaw biakpiakna ngeinate 1:1-7:38
Thiampi tu in Aaron le a tapate kipsakna 8:1-10:20
Thukham taw kisai a zeksa thiangtho le thiangtho ngawl 11:1-15:33
Kilemna Ni 16:1-34
Nuntakna le biakna ah thiantho natu ngeinate 17:1-27:34

Thiampite 1

Pumbup Meihal Biakpiaknate

1TOPA omna Puanbuk sung pan TOPA in Moses sam a, 2Israelte ii biakpiakna a nei ciang a zui tu in a nuai a ngeinate pia hi.

Mihing khat papo in nganhing taw biakpiakna a nei ciang, a khuihon sung pan khat ahizong, a tuuhon ahibale a kealhonte sung pan khat ahizong, pia tu hi. 3A khuihonte sungah khat taw meihal biakpiakna a pia ahile, a mealhem ngawl khuital khat hi tu hi. TOPA ii a san thei natu in TOPA omna Puanbuk kongbiang ah pia tu hi. 4Ama in khuital lu tungah a khut nga tu a, tasia sia ama khialnate mai sak natu biakpiakna in kisaang tu hi. 5Tua lai ah ama in tua khuital ngo tu a, Aaron tapa thiampite in khuital chisan sia TOPA tungah a piak zawkciang Puanbuk kongbiang ah a om biaktau pangh li ah a chi the tu hi. 6Taciang ama in a vun hoai in a sa sem tu a, 7thiampite in biaktau tungah thing sia in mei taw tu hi. 8Amate in a kisemsa sa teng, a lu le a thau taw mei tungah koi tu hi. 9Ama in a sungkua le a nungpeangte nii, sil tu a tavuan nei thiampipa in sa teng biaktau ah hal tu hi. Tua an taw biakpiakna ii a ngim sia TOPA in dik a sa hi.

10Mihing khat in a tuu ahibale a kealte sung pan khat taw biakpiakna a nei le, a mealhem ngawl a tal khat hi tu hi. 11Ama in biaktau sak sangah tasia ngo tu a, biaktau pangh li ah thiampite in a chi the tu hi. 12A sa a sem zawkciang thiampipa in a sa teng mei tungah koi tu a, a lu le a thau zongh kihel tu hi. 13Ama in a sungkua le a nungpeangte nii sil tu a, thiampipa in TOPA tungah biakpiaknate pia in biaktau tungah hal tu hi. Tua in TOPA tungah ngimnamtui biakpiakna ahi hi.

14Mi khat in vacim khat taw meihal biakpiakna a pia le, ngam vakhu khat ahi bale, inn vakhu khat hi tu hi. 15Thiampipa in tua biakpiakna sia biaktau ah paipui tu a, a ngawng meaktan in, biaktau tungah a lu hal tu hi. Biaktau pangh ah a chite taak sak tu hi. 16A longtawl le a tawl sungah a om teng la tu a, vut koina, biaktau ii nisuana sangah vawk tu hi. 17Ama in a thate nii pan len tu a, a thate tat sak ngawlin a pum balkeak tu a, biaktau tungah hal tu hi. Tua in TOPA tungah ngimnamtui biakpiakna ahi hi.

⇑

[Remove Footnotes]