Thiampite 9

Aaron in Biakpiaknate Pia

1Thiampi kipsakna teng a man khuavak ni in Moses in Aaron le a tapate le Israel lampuite sam hi. 2Ama in Aaron tungah, “A mealhem ngawl khuital khat le tuutal khat paipui in, TOPA tungah biakpiakna in pia in. Mawmai biakpiak natu in khuital le meihal biakpiak natu in tuutal hi tu hi. 3Taciang Israel mite tungah mawmai biakpiak natu in kealtal khat, meihal biakpiak natu in a mealhem ngawl kum khat a pha khuino khat le kum khat a pha tuuno khat, 4kipawlkhop biakpiak natu in khuital khat le tuutal khat a ken natu in son in. Sathau taw a kihel anvui taw amate in TOPA tungah sangaw biakpiakna pia tu uh hi. Amate in hi teng vawt tu uh hi, banghangziam cile tuni in amate tungah TOPA kilangh tu hi,” ci hi.

5Moses thupiak bangin amate in Puanbuk mai ah na theampo paipui a, TOPA a bia tu in mihonte tua munah kikhawm uh hi. 6Moses in, “TOPA ompuina a tee khuavak note tungah a kilangh thei natu in hite theampo seam tu in TOPA in note thu hong pia zo hi,” ci hi. 7Taciang ama in Aaron tungah, “Biaktau ah pai in na mawnate le na mite mawnate a mai natu in, mawmai biakpiakna le meihal biakpiakna pia in. TOPA thupiak bangin, mite mawnate a mai natu in hi biakpiakna pia in” ci hi. *

8Aaron biaktau ah pai in a mawmai natu biakpiakna in khuital moi khat ngo hi. 9A tapate in sachi puak a, ama in sachi sungah a khutme papin biaktau kingh a kipeena teng sachi pawlkhat noai in, biaktau bul ah a taanglai teng sung hi. 10Taciang Moses tungah TOPA thupiak bangin Aaron in a thau, a nautate le a thin saphabel teng biaktau tungah hal hi. 11Ahizong ama in a satak le a vun sia ngiaphual pua sangah hal hi.

12Ama meihal biakpiak natu in ama in nganhing ngo hi. A tapate in sachi puakin tua sachite biaktau pangh li tengah the hi. 13Amate in a lu le a sa dangte a khut sungah pia a, ama in tua sate biaktau tungah hal hi. 14Taciang ama in a sungkua teng le a nung peangte nii silin a omlai meihal biakpiakna tung biaktau tungah hal hi.

15Tua zawkciang ama in mipite atu biakpiakna pia hi. Ama in ama mawmai natu biakpiakna a vawt bangin mipite mawmai natu in a kipia keal sia kai in ngo a, biakpiakna in pia hi. 16Ama in meihal biakpiak natu in nganno zongh paipui a, ngeina om bangin biakpiakna in pia hi. 17Ama in antang biakpiakna pia a, anvui khutdim khat la in biaktau tungah hal hi. (Hi in nisim meihal biakpiakna belapna ahi hi.) 18Ama in mipite atu kipawlkhop biakpiakna in khuital sia le tuutal sia ngo hi. A tapate in sachi puak a, ama in biaktau pangh li teng ah the hi. * 19Aaron in khuithau le tuutal thaute, 20nganhingte ii awmsa tungah koi in biaktau ah paipui siat hi. Ama in biaktau tungah a thaute halin 21Moses thupiak bangin a awmsate le a phei ziatsangte thiampite atu in TOPA tungah a tuam vilvel letsong in pia hi.

22Aaron in biakpiakna teng a man ciang mipite tungah a khutte laamin thupha pia a, tua zawkciang tuaksuk hi. * 23TOPA omna Puanbuk sungah Moses le Aaron tum a, hong pusua ciang amate in mipite thupha pia in, TOPA ompuina a tee khuavak sia mipite tungah kilangh hi. 24Thakhat thu in TOPA in meikuang puak a, biaktau tungah a om meihal biakpiakna le a thau teng tua meikuang in haltum hi. Mipite sia tua meikuang a mu uh ciang au in a mai leipha in boksuk uh hi.

⇑

[Remove Footnotes]