MALACHI

Thupatna

Malachi laibu sia Jerusalem Biakinn a kisak kik zawk kum za sim nga hun pawlin ki at hi. Kamsangpa ii thinbot bel thu sia, thiampite le mipite in, Pathian taw a thuciamna sungah thumaanna a thaksua kik natu ahi hi. Pathian mite in a biakpiakna le a nuntakna sungah ngaingonna le pheang tatnate om hi ci in kilangh hi. Thiampite le mipite in Pathian tungah a piak tu bang a piak ngawlna le Pathian hil bang a nuntak ngawlna taw Pathian theam uh hi. Ahihang TOPA in a mite thukhen tu le thiansua tu in hong pai tu hi. Ama thuciamte taangko tu le a lampi pua khol tu in a kamtaipa Ama mai ah pai khol sak hi.

A kihel Thulute
Israelte mawna 1:1-2:16
Pathian thukhenna le a hesuakna 2:17-4:6

Malachi 1

1Hisia in Malachi ii Israel mite tungah a son tu TOPA ii a piak thu ahi hi.

TOPA ii Israelte A itna

2TOPA in a mite tungah, “No kong it tawntung hi,” ci hi. *

Ahihang amate in zo kik a, “Kote nong itna bangbangin hong lak na ni ziam?” ci uh hi. *

TOPA in zo kik a, “Esau le Jacob sia unau laipee ahihang Jacob le a suan a paalte ka it a, 3taciang Esau le a suan a paalte ka ensan hi. Esau ii mualtung ngamte ka sutham a, a leitangh sia ngamsate atu in ki nusiat hi,” ci hi.

4Esau suan le paal Edomte in “Ka khuapite uh hong suksiat sak hi, ahihang tuate ka sa kik tu uh hi,” a ci le TOPA in “Sa kik ma hen ka baltham kik tu hi,” ci in a zo kik tu hi. Mihingte in amate tungah “Ngitlo khan siatna ngam le TOPA ii a tawntung a thin uukna ngam” ci tu uh hi.

5Israel mite in hite a mittang uh taw mu tu a, taciang “Israel ngam pua sia ngangawn ah TOPA sia thahat hi,” ci tu uh hi.

TOPA in Thiampite Teih

6Vaanglianbelpa TOPA in thiampite tungah, “Tapa khat in a pa thasia a, innteang khat in a topa zakta hi. Keima in na pa uh ka hi a,— banghangin hong upat ngawl nu ziam? Keima in na TOPA khi hi, banghang hong zakta ngawl nu ziam? No in kei hong zawngsak napi in, ‘Bangbangin hong zawngsak khu ziam?’ na ci lai uh hi. 7Bangbangziam cile hi bang hi– ka biaktau tungah a mannung ngawl ante nong pia uh hi. Tua zawkciang note in, “Bangbangin hong zakta ngawl khu ziam, ci in nong dongh uh hi. Hong son tong ka biaktau na zawnsakna uh le bangma in na thu sim ngawlna uh taw nong zatak ngawlna uh kilangh hi. 8A mittaw, a nangh, a peangbai, ngannote taw sangaw biakpiakna nong nei uh ciang, tabangte sia bangma phamaw sa ngawl, na hi uh ziam? Ngam ukpa tungah tabang ngannote pia ka sin vun. Note tungah ama lungkim in maipha hong pia tu ziam?” *

9Tu in no thiampite awng, ko tungah Pathian hong dik natu in ngen sin vun. Ama in na thungetna hong zo ngawl tu a, tua in noma mawna hang hi tu hi. 10Vaanglianbelpa TOPA in, “Ka biaktau tungah a mannung ngawl meite na hal thei ngawl natu in note khat po in Biakinn kongkhate khak le ka oai hi. No tungah ka lungkim ngawl a; kei kung nong paipuina biakpiaknate kong saang batu hi. 11Leimong khat pan mong khat a om mihingte in kei hong upat uh hi. Mun theampo ah amate in ngim namtui hong hal a, taciang a saan thamman sangaw biakpiaknate hong pia hi. Amate theampo in kei hong upat uh hi. 12Ahizong note in keima biaktau sia bangma manh nei ngawlin na son uh a, tua biaktau tungah na piak uh ante thupi ngaisut ngawl na hi uh ciangin, keima hong zawngsak na hi uh hi. 13“Hite bangza in cimtaak huai ziam! ci in nong mukmen uh hi. Nong biakpiak natu in na nguk uh ngannote tua ahibale a peangbai, a nanghnote nong paipui uh hi. Note tung pan tabangte hong saang tu in hong um nu ziam? 14A nganhon sung pan a limci khat keima tungah piak tu in hong kamciam napi, hong theam in a mannung ngawl nganno khat kei tungah sangaw biakpiakna in hong piapa in haamsiatna thuak tahen! Banghangziam cile kei sia kumpi lian khat ka hi a, ngam theampo pan mihingte in kei hong kiita uh hi,” ci hi.

⇑

[Remove Footnotes]