Malachi 3

1Vaanglianbelpa TOPA in zo kik a, “Ka lampi a sial khol tu in ka kamtaipa ka pai sak tu hi. Tasia ciang na zon uh TOPA sia ama Biakinn sungah thakhat thu in hong pai tu hi. Mu tu in na ngalaak uh kamtaipa hong pai tu a, ka thuciamnate hong taangko tu hi.” *

2Ahihang ama hong pai ni sia akua peuma in thuak zo tu hi ziam? Ama hong kilangh ciang akua nungta zo tu ziam? Ama sia puan a thiang sak satpia le thik a thiang sak thei meikuang taw kibang hi. * 3Ngun tui sakin a thiangtho sakpa khat bangin ama sia thukhen tu in hong pai tu hi. Thik seakpa in kham le ngun tui sakin a thiantho sak bangin TOPA kamtaipa in thiampite thiangtho sak tu a, tabang a maan biakpiakna sia TOPA kungah hong paipui tu hi. 4Nidang hun bangma in Judah le Jerusalem mite ii piakna sia TOPA in saang thanuam kik tu hi.

5Vaanglianbelpa TOPA in, “Note thukhen tu in note kungah kong pai tu a, bum le ai toaite, palngul mawna vawtte, leeilot tetti pangte, a kicial naseamte ii thaman a neaktum sakte, meingong tanga le ngamdang mite tungah meet natu a zongte le kei hong zakta ngawlte theampo tungah maw sakin thu ka khen tu hi.”

Sawm a khat Piakna

6Keima in TOPA ka hi a, ka kikheal bua hi. Taciang no, Jacob suan le paalte zongh na mong siat balai uh hi. 7Note maiah na pu na pate bangma in ka thukhamte pan na puapial uh a, na zui bua uh hi. Kei kungah hong heak kik tavun, tua hile kei zongh no sang kong nga tu hi. Ahizong “Nang sangah bangbangin hong heak kik tu khu ziam?” ci in nong dongh uh hi. 8Tua ahile thu khat hong dongh tong, mihing khat in Pathian a theam tu sia a kilawm tu ziam? Kilawm dek ngawl hi, hi napi no in kei nong theam uh hi. “Bangbang in maw?” ci nu hi. Sawm a khat le sumpi piakna sungah, hong theam nu hi. 9Note tungah haamsiatna khat hong tung hi, banghangziam cile minam buppi in kei nong theam uh hi. 10Biakinn sungah an tam mama a om thei natu in sawm a khat a cingin hong paipui tavun. Kei hong sin tavun, vantung khelkite ka hong tu a, na pha namcinte kicing takin kong buaksuk na mu tu uh hi. * 11Lungnote in na lo ante a lal sak batu a, na sapit nguite sapit nga taw kidim tu hi. 12Taciang, na ngam uh sia ten natu in leitangh pha hong suak tu ahikom minam theampote in mi nuamsa te hong ci tu uh hi.

Hesuak natu Pathian Kamciam

13TOPA in, “Kei taw kisai in a zaak thada huai na pau uh hi,” ci hi. “Ahizong note in, nang taw kisai bang teng pau na khu ziam? ci nu hi. 14Note in, “Pathian na ih sep a luithathong hi. Ama hong sawl bang a ih sep hangin bang kimanna om a, ih ngamtatna sate hangin khuangaina lim Vaanglianbelpa TOPA mai ah ih lak hangin bang phat tuamna om ziam? 15Ih mu bangin ci leang mihing kiphasak teng ma in nuamsa uh hi. Ngamtat siate sia ci thei bek ngawlin a ngamtat siatnate uh taw Pathian thin sauna ze-et napi, bangma tat tuan ngawl hi,” na ci uh hi.

16Taciang TOPA a kiita mihingte khat le khat kipaupui a, TOPA in amate son teng ngai in za hi. Amate omna ah TOPA a kiitate le a zaktate tepteena laibu khat ki at hi. 17“Amate sia ka minamte hi tu hi.” Vaanglianbelpa TOPA in ci hi. “Ka dian ni hong tun tak ciang amate sia keima neisa hi tu hi. Ama atu a sep sak tapa tungah pa in hesuakna a nei bangin amate tungah hesuakna ka nei tu hi. 18Kei atu hong sep sakte le hong sep sak ngawlte, thutangte le a ngilote tungah a piang thute a kilamdanna, ka mite in khatvei mu kik tu uh hi,” ci hi.

⇑

[Remove Footnotes]