MICAH

Thupatna

Kamsangpa Micah sia Isaiah taw khanngual khat hi a, thangsang Judah ngam khuapino khat pan ahi hi. Saksang ngam in haksatna thuak tu hi ci in Amos son khol bangin Judah ngam zongh in thuak tu a, mihingte ii a etsat huai thumaan ngawlnate hu in Pathian in mihingte daan pia tu hi cisia Micah in he hi. Ahihang Micah ii kamsaanna in mai sangah lametna om lai ci thute a thiangtho zaw le a kitel zaw in son hi.

Hi laibu sungah a teptee huai thu in, Pathian khutnuai ah vannuai kilemna om tu; (4:1-4), David suan sung pan kumpi lian khat hong pian natu le ngam sungah kilemna hong puak tu son kholna; (5:2-4); le (6:8) sungah a tom in a at thu sia Israel kamsangte ii son tu thu, “Pathian in eite bang hong tangkal ziam cile: a maan sep tu, a kip ki itna lak tu, taciang kiniamkhiakna taw in ih Pathian taw kithawl khawmin nuntak tu” ahi hi.

A kihel Thulute
Israel le Judah tungah, thukhenna 1:1-3:12
A ngei bang hi kikna le kilemna 4:1-5:15
Kidop natu le lamet natu thupuak 6:1-7:20

Micah 1

1Judah ngamah kumpi Jotham, Ahaz le Hezekiah te a maan laitak, Moresheth khua mi ahi Micah tungah TOPA in hi thu puak hi. Samaria le Jerusalem taw kisai in Micah tungah TOPA in hi thute lak hi. *

Samaria le Jerusalem atu Kaala

2Hi thu ngai vun, no ngamte theampo awng; 3TOPA sia ama mun thiangtho pan hong pai hi; 4Taciang meikhuk sungah khuainun a tuithap bangin

5Hite theampo tung tu hi, banghangziam cile Israel mite khialin, Pathian langpan uh hi. Israelte ii langpanna sia akua ki mawsiat tu ziam? Ngambup khuapi mama ahi Samaria hi! Akua in Judah ah milim biakna taw khial ziam? Jerusalem ama mama hi! 6Taciang TOPA in, “Samaria sia ngam tanzau nin kholna mun sapit ngui ciin natu mun ka suak sak tu hi. A khua sungah suangte zongh kuam sungah ka sungsuk tu a, a khuapi phungkawngte ka kilangh sak tu hi. 7A milim manpha theampo a bebekin ki suzan tu a, biakinn sungah pumpi zuak numeite tungah a kipia nate theampo mei taw kihaltumin, a milimte theampo a kinusia ninthuk suak tu uh hi. Samaria in hi vanh ninte a pumpi kizuakna taw nga a, tu in a ngalte in tua vanh ninte mun theampo ah a om biakinn pumpi kizuakte atu in pua tu uh hi,” ci hi.

8Taciang Micah in, “Hi sia hu in mauin ka kap tu hi. Ka khuangaina ka lakna in peangdap thua ngawl, puan silh ngawlin ka vak kakoai tu hi. Ngam ui bangin ka haam tu a, kalauh vacim bangin ka tau tu hi. 9Samaria ii liammate kidam sak thei ngawl hi, taciang Judah zongh tabangma in thuak tu hi; lalcipna sia, ka mite tenna Jerusalem kongpite mama ah theng zo hi,” ci hi.

Ngalte in Jerusalem Neak

10Gath a om ih ngalte tungah ih ngallelna thu son heak vun; na kaa uh mu sak heak vun. Beth Leaphrah mite awng na thinkiamna lakna in leivui sungah kilumliik vun! 11No Shapir khua mite awng, maizum le pum nguakin ngamdang ah saltang vun. Zaanan ah a teangte a khuapi sung pan pusuak ngam ngawl uh hi. Bethezel mite mauna na zaak uh ciang tua munah buhna om ngawl hi, ci in na he tu uh hi. 12Maroth mite in huna a nga natu ngakla mama uh hi, banghangziam cile TOPA in Jerusalem khua paam dong ah siatna theng sak zo hi. 13Lachish a, a teang note awng, na siphute leangte tungah khit vun. Note in Israel mite khialna na zui uh a, tabangin Jerusalem na khial sak uh hi. 14Tu in Judah mite awng, Moresheth Gath khuapi tungah mangpha thaak tavun. Israel kumpite in Achzib khua pan huna nga ngawl tu hi.

15Mareshah mite awng, na khuapi a la tu ngalte khut sungah TOPA in no hong aap tu hi. Israelte ii lampuite pai in Adullam suanghawng sungah buu tu uh hi. 16Judah mite awng, na it patangnote atu in khuangai in na sam uh meettan vun. Vaciik bangin lutol in om vun, banghangziam cile na patangnote sia ngamdang ah sal in no kung pan kila tu hi.

⇑

[Remove Footnotes]