NEHEMIAH

Thupatna

Nehemiah Laibu sia khen li in kikhen thei hi. (1) Persia ngam uk lianpa in Judah ngam uk tu in a sawl Nehemiah ii Jerusalem ah a cia kikna. (2) Jerusalem luphungte cian kikna. (3) Ezra ii a ciliap huai takin Pathian Thukham a simna le mipite ii a mawna uh a pualaakna. (4) Nehemiah ii Judah ngam uk a hina taw a sep thua te.

Hi laibu sungah a teptee huai thu khat in Nehemiah ii nasia tak a, Pathian tungah a kingakna le Pathian tungah a thunget tawntungna ahi hi.

A kihel Thulute
Jerusalem ah Nehemiah cia kik 1:1-2:20
Jerusalem luphungte kiciang kik 3:1-7:73
Thukham kisim a, thuciamna ki thaksua kik 8:1-10:39
Nehemiah ii sep tatuamte 11:1-13:31

Nehemiah 1

1Hi sia in Hacaliah ii tapa Nehemiah ii nasep zaw sa teng tepteena ahi hi.

Nehemiah ii Jerusalem A thinbotna

Kumpi Artaxerxes ii Persia kumpi a sep a kum kul kum, Kislev tha in keima Nehemiah sia Susa khuapi ah ka om hi. 2Ka suapui khat ahi, Hanani sia midang pawlkhat taw Judah pan hong theng a, amate tungah Jerusalem khua thu le Babylon ngam saltanna pan a cia kik Jew ih mipuite thu ka dongh hi. 3Amate in, saltanna pan a suaktate a khua a tui a thet uhciang haksatna lianpi a thuaknate le a kiim a paam a teang ngamdangte ii a nomuna thu teng ka tungah hong son uh hi. Amate in, Jerusalem luphungte cimhtham lai a, kongpite zongh kaangtum in a kivawt kik ngawllaina thute zongh hong son uh hi. 4Hi thu teng ka zaak ciang to suk in ka kap hi.

Ni tam mama sung ka mau a an ka ne bua hi. Pathian tungah thu ka ngen a, 5“Vantung Pathian, TOPA awng! Nang na lian a, nangma kiita in ka om uh hi. Hong itte le na thupiak a zuite tungah na thuciamna thumaan takin na kip sak hi. 6TOPA awng, hong en tan a, Israel mite ahi na naseamte atu a sun a zanin, ka thungetna hong ngai tan. Ko Israel mihingte ka khial zo uh a, ka khialnate hong pualaak khi hi. Ka pu ka pate le keima ka khial zo uh hi. 7Ngilo in nang tungah kong khial zo uh a, nong thupiakte ka zui bua uh hi. Na naseampa Moses tungtawn a nong piak thukhamte ka zui bua uh hi. 8Moses tungah: ‘Israel mihingte ka tungah nong thumaan bua uh ahile mi namdangte sungah kong thethaang tu hi. * 9Ahizong ka kungah hong heak kikin ka thupiakte na zui uh le, leimong dongin na kithethaang ta uh zongin keima biak natu in ka tealna sa mun ah kong paipui kik tu hi,’ na ci thute tu in phawk kik tan. *

10“TOPA awng, hite in nangma mi na naseamte ahi uh hi. Na vaangletna le na thahatna taw amate na suatak hi. 11Ka thungetna le nangma hong upat nuam na naseam dangte theampo ii thungetnate tu in hong ngai tan. Tuni in zawna hong pia tan a, ngam uk lianpa in hong hesuak sak tan,” ka ci hi.

Tua hun lai in keima in ngam uk lianpa ii tungah zu pia pa ka hi hi.

⇑

[Remove Footnotes]