NGAMSUNG VAKNA

(Numbers)

Thupatna

Ngamsung Vakna Laibu sungah Israelte ii Sinai Mual a nusiat a kipan Pathian ii amate tungah piak tu in a ciam sa nisuana ngamngi ciang a thet dong kum sawmli dektak sung Israelte tangthu kison hi. Hi laibu sungah a thupi bel in Israelte mi phaza kisim na hi a, Sinai Mual pan a din ma in Moses in mi simna vawt a, tua zawk khang khat bang ciangin Jordan ngun nisuana sang Moab ngamah mi simna vawt kik hi. Mihing phaza kisimnate nii, kilaklaw sungin Israelte in Canaan ngamsung ngamngi Kadesh Barnea ah pai uh a, ahizong tua mun panin khap sa ngamah tum zo ngawl uh hi. Tua ngamah kum tam mama a vaithaam zawkciang Jordan ngun nisuana sangah pai uh a, pawlkhatte tua ngamah teangin, pawlkhatte ngun kantan in, Canaan ngamah tum tu in kithoai uh hi.

Ngamsung Vakna laibu sia thu haksa a phul uh ciang lau in, a thinkiam, Pathian a langpan le, amate lampui tu a Pathian ii a koi Moses a langpanna thute tepteena ahi hi. Ama mite ngina ngawlin thumaan ngawl hi kale Pathian ii thumaan a a kep kenkon na thu le khat vevei a thintom tha ahitazong Pathian tung le ama mite tungah Moses lungtang a khona thu ki at hi.

A kihel Thulute
Sinai Mual pan Israelte ding tu in kithoai 1:1-9:23
   a. A masa misimna 1:1-4:49
   b. Thukham le ngeina tatuamte 5:1-8:26
   c. A nii veina Paisan Poai 9:1-23
Sinai Mual pan Moab ngam dong 10:1-21:35
Moab ngamah thupiangte 22:1-32:42
Egypt pan Moab ah paina thu tomsonna 33:1-49
Jordan kantan ma in kihilna 33:50-36:13

Ngamsung Vakna 1

Israelte A masa bel Mihing phaza a kisimna

1Israel mite Egypt pan a pusua zawk a kum niina, a tha niina ni masa bel ni in, Sinai Senneal ngam Pathian omna Puanbuk sungah TOPA in Moses paupui hi. TOPA in, 2. “ Nangma le Aaron in Israel mite a be a phung le a innkuan tekin misimna nei tu nu hi. Pa a minpiang, 3kum kul le a tungsia ngalkap seam thei tu peuma a min sazian la vun. 4Hong hu tu in be khat sung pan ukpi khat veu ngen tavun,” ci hi. 5-16 Hi mihingte sia hi na seam tu in mihonte sung pan a kiteal minam lampuite ahi uh hi.

Minam Be le phung ukpi
Reuben Shedeur tapa Elizur
Simeon Zurishaddai tapa Shelumiel
Judah Amminadab tapa Nahshon
Issachar Zuar tapa Nethanel
Zebulun Helon tapa Eliab
Ephraim Ammihub tapa Elishama
Manasseh Pedahzur tapa Gamiliel
Benjamin Gideoni tapa Abidan
Dan Ammishaddai tapa Ahiezer
Asher Ochran tapa Pagiel
Gad Deuel tapa Eliasaph
Naphtali Enan tapa Ahira

Hi pasal sawm le niite amate be le phung tek pan ukpi hi a, misimna ah naseam tu in a kitealte ahi hi. 17Hi pasal sawm le niite ii huna taw Moses le Aaron in, 18a tha niina, ni masa bel ni in, a huam mihon bup sam a, a be a phung le innkuan taw kizui in mihing theampo sazian vawt hi. 19TOPA thupiak bangin, kum kul le a tungsia pa peuma, kisimin a min kiciamtee hi. Sinai Senneal ngamah Moses in mihingte min sazian la hi. 20-46Ngalkap na a seam thei tu kum kul pan a tungsia pa peuma a be a phung le innkuan taw kizui in min kikhum a, Jacob tapa lian bel Reuben minam taw kipan hi. A vekpi in a nuai a bang ahi hi.

Minam Mihing phaza
Reuben 46,500
Simeon 59,300
Gad 45,650
Judah 74,600
Issachar 54,400
Zebulun 57,400
Ephraim 40,500
Manasseh 32,200
Benjamin 35,400
Dan 62,700
Asher 41,500
Naphtali 53,400
A vekpi: 603,550
*

47Levite sia be dangte min kikhumna ah kihel ngawl hi, 48banghangziam cile TOPA in Moses tungah, 49“Ngalkap na a seam thei tu mihingte na sim ciang, Levi minamte kihel sak heak in. 50Ahizong Levite ka omna Puanbuk le tua nate theampo a cing tu in koi in. Amate in Puanbuk le vanhte pua tu uh a, pha takin keamin a ngiaphualte tua Puanbuk kiimah sa tu uh hi. 51Na ngiaphual na khin simin Levite in Puanbuk phel tu a, ngiaphual thak ah sa kik tu uh hi. Mihing khat papo Puanbuk paam ah a pai le kithatlum tu hi. 52A taanglai Israelte in amate tek ii, laandial nuai ah a hon a hon in ngiaphual saat tu uh hi. 53Ahizong kuama in hong neak a, Israel mihonte tungah ka thin hong uk sak ngawl natu in, Levite in Puanbuk kiim ah ngiaphual saatin cing tu uh hi,” ci hi. 54Tabangin TOPA in Moses tungah a thupiakte theampo Israel mite in seam siat uh hi.

⇑

[Remove Footnotes]