PAUNAKTE

(Proverbs)

Thupatna

Paunak laibu sia ngamtat phat natu le biakna taw kizui in, kihilna hon khat a kitopna hi a, paunak taw a ki at ahi hi. Tuate ii sungah tam mama in nisim a, zaktawm thei thute ahi hi. A kipat pan ma phaw kik natu bang hil ziam cile “Ciimna, na nei natu in TOPA na zakta phot tu hi” ci hi, tabangin zomto a, biakna taw kisii a, ngamtatna bek hi ngawlin eima ngaisut thei thute le ngamtat phatna thute kihel hi. Taangh lai Israel mite ii syate in hun khat papo sungah bangbangin ngamta tu ci in hilnate a tomno paunak taw lak hi. Hi thute pawlkhat sia innkuan vai taw kisai hi a, a dang sia sum lei sum zuak nasep taw kisai hi. Pawlkhatte sia u le nau sung a kihelna ah ngamtat pha neina taw kisai a, a dangte eima le eima ki uk zawkna a kulna thu cibangte ahi hi. Mihingte ii zia le tong, phatna, kiniamkhiak na, thinsauna, a zawngte thasiana, le ngualtamte tungah thumaanna huvau taw kisai in thu tam ma ki at hi.

A kihel Thulute
Ciimna pokna 1:1-9:18
Solomon paunakte 10:1-29:27
Agur ii kammalte 30:1-33
Paunak tatuamte 31:1-31

Paunakte 1

Paunakte Manneina

1Israel kumpipa David tapa Solomon paunakte ahi hi. *

2Zia sungah paunakte in ciimna le ngaisut pha piakna tel thei natu hong hu tu a, a khiakna thuk paunakte hong tel sak tu hi. 3Tuate in ciimna taw bangbangin nungta tu, bangbangin thumaan tu a, thutang tu, thukhual thei tu, ci in nang hong hil tu hi. 4Tuate in heakna a nei ngawl lai khat pil sak tu a, taciang in khangnote kicinna a nei thei natu in hil hi. 5Hi paunakte in a ciimte tungah heakna zongh belap tu a, pilna saang a neite lamlak tu hi, 6tasia ciangin amate in paunakte ii a kiseal khiaknate he thei tu a, mihing ciimte haksatna huvau a dok thute zongh tel thei tu uh hi.

Khangmoite Ngaisut pha Piakna

7Heakna na nei natu in TOPA zatakna na nei phot kul hi. Mihing mamawte in ciimna awlmawk ngawlin sin nuam ngawl hi. *

8Na pa le na nu hong sonte pha takin nadon in, ka tapa awng. 9Amate hong hilnate in a et hoi dial khawng, khi khawng ii na meal hong hoituam sak bangin na ngamtat zia hong pua sak tu hi.

10Ka tapa awng, mimawte hong ze-et ciangin zui heak in. 11Sonteena in amate in “Hong pai tan ih thalup tu khat zong ka tawng! Mawna nei ngawl khat cimthoina in that ka sin tawng! 12Amate ih mu tuung laitakin nungta ciidam hi kale amate tungah ih vawt nop teng ih man ciang thi siat tu hi! 13Hauna namcin ih mu tu a, ih innte sia ih sutol vanhte taw ih dim sak tu hi. 14Hong pai tan a hong pawm tan, ih nguk theampo ih hawmtek tu hi,” hong ci tu hi.

15Ka tapa awng, mihing tabangte taw kithawl heak in. Amate kung pan kiheam in. 16Amate in a sia khat a vawt tu ngakla hi. Amate in a thatlum tu in a tawntung in kinging hi. 17Na mat nop vacim sia ii mutang in thaang nasia hang, bangma phatuam ngawl hi, 18ahihang mihing tabangte in amate le amate thaang kisia uh hi, tua thaangte sungah amate thi tu uh hi. 19Mihing suamna in a suamte nuntakna siik kik vaciat hi, molngolna taw a nungta khat papo tungah tabangma in tung hi.

Ciimna in hong Sam

20Ngai in! Ciimna in khuapi lampi liante sung le sumzuakna ah hong sam hi, * 21mihingte kisiktua na munte le khuapi kongpite ah nging takin hong sam hi:

22“Mihing mamawte awng, bangtan vei mamaw nuam nu ziam? Ciimna bangtan vei ciammui vawt tu nu ziam? Ciimna kan ngei ngawl tu nu ziam? 23Kong tei ciangin hong ngai tavun; ngaisutna pha kong pia tu a, ka heaknate kong hawm tu hi. 24Hong sasam khi hi, taciang hong pai tavun ci in hong thaw khi hi, ahihang hong ngai nuam ngawl nu hi. Kei sia hong nadon nuam ngawl nu hi. 25Ngaisutna pha kong piak theampo thusim ngawl nu hi, taciang kong hil kong pau tu zongh nong oai ngei bua uh hi. 26Tua ahikom ngim na nga ciang, kong nuisan tu hi. Launa lian tatak in nang hong vaat a, 27na tungah suangval bangin hong va a, ngimna vuipi hong puakin, nang sia natna le cimawkna taw na om hun ciangin kong nuisan tu a, kong nunau tu hi. 28Taciang ciimna nong kan tu a, ahihang kong zo batu hi. Mun theampo ah hong zong ka lete zong nong mu batu hi. 29Heakna bangma hunin na thusim ngei bua a TOPA thu nit tu zongh na nial tawntung hi. 30Ngaisutpha kong piakte na dei ngei bua a, kong hil kong pau ciangin nong nadon bua hi. 31Tua ahikom, a kiphu bangin na nga tu hi, taciang nangma ngamtatna ma in na ci hong na sak tu hi. 32Heakna kicing ngawlte thi hi, banghangziam cile amate in ciimna nial uh hi. A mamawte sia amate thinbot thei ngawlna in lal sak hi. 33Ahihang a kuama po kei thu hong ngaite in ngam muanna nei tu hi. Ama sia suakta in om tu a, a launa tu bangma thu a om batu hi.”

⇑

[Remove Footnotes]