RUTH

Thupatna

Ruth ii ngal thu a kihel ngawl tangthu sia thukhente hun, kitha kimat hun sung a ki at ahi hi. Ruth sia Moab numei khat hi a, Israel mi khat tawh teang hi. A pasal thi ciang a om vazaak ngei ngawl thumaanna sia a tonupi tungah nei a, Israel te Pathian tung zongah kipiak khiatna nei hi.. A tawpna ah ama in pasal thak khat sia a pasal masate ii mealheak sung pan nga hi. Tabangin ama sia Israelte ii kumpi teng po pan a lianbel David ii pi selawn hong suak hi.

Pathian ii mihingte in ama kung panin a pial uh ciang tuasiatna lianpi piang ci thu sia thukhente tangthu sungah ki at hi. Ngamdang mite zongh Israelte ii Pathian sangah hong kihei leh thupha saangin, a thumaan ama ii mihingte hong suak thei ci thu Ruth in lak hi.

A kihel Thulute
Naomi sia Ruth tawh Bethlehem ah cia kik 1:1-22
Ruth leh Boaz kisi 2:1-3:18
Boaz in Ruth ten pui 4:1-22

Ruth 1

Elimelech le A Innkuanpuite Moab ngam Theng

11-2 Khua ngeipi lai, Israel te in kumpi a nei uh maa in, a ngam sungah kialpi hong tung hi. Tua ahikom pasal khat Ephrath be te sung pan, Judah ngam Bethlehem khua a teang Elimelech ci khat om hi, ama in a zi Naomi leh a tapate nii, Mahlon leh Chilion tawh moab ngamah tawmvei sung teang tu in pai hi. Tua munah a ten lai in, 3Elimelech hong thi hi, taciang Naomi sia Moab ngaknute ahi Orpah leh Ruth 4a tenpui a tapate nii taw, taang hi. Kum sawm bang zawkciang 5Mahlon leh Chilion zongh hong thi uh hi, taciang Naomi sia pasal ngawl ta ngawl tawh hong taang hi.

Naomi le Ruth Bethlehem khua ah hong Heak kik

6Tua zawk tawmvei ciangin, TOPA in ama ii mite sia thupha pia a, an tam mama la hi ci in Naomi in za hi; tua ahikom a mote nii taw a tenna uh nusia tu hong kinging hi. 7Judah ngam ah cia tu in amate kipan khawm tek ahihang lampi tungah 8ama in amate mun ah, “Cia kik tavun a, na nute uh taw om tavun. Kei tung le a thi sa te tungah nong thuthiam uh bangma in TOPA in no tungah hong thuthiam tahen. 9Taciang TOPA in no ngeal sia pasal nei kikin inn khat veve nei kik tu in hong siam tahen,” ci hi.

Tua ahikom vaithakna in Naomi in a mote nii sia namh hi, ahihang amate kap tu hong kipan a, 10“Heak kik ngawl tu khu hi! Na minam pui te kung zuan tu in pai tu khu hi,” ci uh hi.

11“Ka tanute awng, na heak kik uh kul tu hi,” ci in Naomi in zo kik hi. “Kei taw banghangin paikhawm nuam nu ziam? Na pasal tu uh tapate vei hing kik thei lai tu hong um nu ziam? 12Cia kik tavun, kei sia pasal nei kik tu in huai lei zo khi hi. Lam et om lai hi ci in tu nitak mama in pasal nei in tapate nei ma leng, 13a khan ngak zo thong tu nu ziam? Hi bang a na ngamtat uh ciang ngualdang na tenpui tu uh hong khak bana tu ziam? Hi ngawl hi, ka tanute awng, tabang sia suak thei ngawl hi ci in na he uh hi. TOPA in kei hong langpan hi, taciang no atu in khuangai mama khi hi,” ci hi.

14Amate kap tu in hong kipan leleau hi. Tua zawkciang Orpah in a to nupi vaithakna in namh a, cia hi. Ahihang Ruth in a thasua nuam bua hi. 15Tua ahikom Naomi in ama tungah, “Ruth awng, na nuphal nu sia a mite le a pathian kungah zuanin cia zo hi. Ama taw cia khawm tan,” ci hi.

16Ahihang Ruth in zo a, “Nang hong nusia tu in hong sawl heak in. Hong pai khawm sak po tan. Na paina theampo ah ka pai tu a na tenna po ah ka teang tu hi. Na mite sia keima mite hi tu a, na Pathian sia ka Pathian hi tu hi. 17Na thina po ah ka thi tu a, taciang tua mun sia ka kiphum natu hi tu hi. Thina khat sim ngawl in kei sia nang taw ka kikhen le TOPA in ngimna lian bel kei tugnah hong tung sak tahen,” ci hi.

18Naomi in Ruth sia ama taw pai khawmt u in a thin nasia tak khensat zo ci in a mu ciang a pau nawn bua hi.

19Bethlehem a thet dong amte pai uhhi. Amate tua mun a thet uh ciang khuathing bup liinglawng in, numei te in, “Hi sia Naomi hi takpi ziam?” ci in au uh hi.

20“Naomi hong ci heak vun, Mara hong ci tavun, banghangziam cile Vaanglian Pathian in ka nuntakna sia kha sak hi. 21Hi sung ka nusiat lai in na tam mama ka nei hi, ahihang TOPA in bangma ngawl taw hong cia sak kik hi. TOPA Vaanglianpipa in hong pua nil zo a, ngimna hong puak zo ahi ciang banghang in Naomi hong cici lai nu ziam?

22Moab mi a monu Ruth taw Naomi ii hong ciana sia tu a bang ahi hi. Bethlehem hong thet hun lai in mangtaang at hun a kipat laitak ahi hi.

⇑

[Remove Footnotes]