ZECHARIAH

Thupatna

Zechariah Laibu sia khen nii in kikhen sinsen hi. (1) A khan lian 1-8 sia kamsang Zechariah ii kamsaan na hi a, B.C. 520 pan B.C.518 hunsung teng ahi hi. Tuate a tam zaw mu kholna hi a, Jerusalem pua kikna, Biakinn sak kikna, Pathian ii mihingte thiansua natu le Messiah hun hong thet natu huvau ahi hi. (2) A khanlian 9-14 sia a kilamen Messiah le a khak bel thukhen natu huvau a kikaikhawm thute ahi hi.

A kihel Thulute
Kidop natu le lametna tu thupuak 1:1-8:23
Israel ii ngampaamte tungah thukhenna 9:1-8
Maisang khanto nop sak natu le kilem natu 9:9-14:21

Zechariah 1

TOPA kungah A Mihingte A cia kik natu Sapna.

1Persia ngamah Darius ngam uk lianpa a maan zawk a kum niina a thaliat tha sungah TOPA in Iddo tupa, Berechiah tapa kamsangpa Zechariah tungah hi thu pia hi. * 2Vaanglianbelpa TOPA in mihingte tungah hi thu son tu in Zechariah sawl a, “Keima, TOPA sia na pu na pate tungah ka thin uuk mama hi, 3ahihang tu in no tungah kong ci hi, ‘Kei kungah hong kiheak tavun, tua hile kei zongh no sangah kong kiheak tu hi. 4Na pute na pate taw kibang nawn heak vun. Khuangeipi lai in kamsangte in amate kungah ka thu son uh a, ngamtat siate ngamta ngawlin a maw nawn ngawl natu in thu hil uh hi. Ahihang amate in ka thu hong ngai nuam ngawlin hong mang nuam bua uh hi. 5Na pu na pate le tua kamsangte nungta nawn ngawl hi. 6Na pu na pate tungah ka naseam kamsangte tungtawn in thu piakna le kidop natu thute ka pia hi, ahihang amate in tuate thusim ngawl a, a ngamtatna taw kizui in ngimna thuak uh hi. Tasia ciang amate kisiikin, Keima, a Vaanglianbelpa TOPA in amate taw a kiphu bang le ka sep tu tatak a ka khensat bangin daan ka piak sia hong telthiang uh hi,’ ” ci hi.

Kamsangpa ii Siphute A mu kholna

7Darius ngam uk lianpa a maan zawk a kum niina (Shebat tha) a tha sawm le tha khat, ni kul le ni li ni zanin TOPA in mu kholna sungah thu khat hong pia hi. 8TOPA vantung lalang khat siphu san khat tungah a to ka mu hi. Ama sia myrtle kici thingkungte kawm kuam sung khat ah ding a, a nung sangah siphu dang a san, a pawl tiptep, le a kaangte om hi. * 9Ama ka dongh a, “Topa awng, hi siphute in bang khiakna nei ziam?” ka ci hi.

Ama in, “Bang khiakna nei ziam ci sia kong lak tu hi. 10TOPA in amate leitung a enkot tu in a pai sakte ahi hi,” ci in hong zo hi.

11Amate in vantung lalang tungah, “Leitung theampo ah pai zo ung, leitung buppi sia cimaw in ki zothal zo hi,” ci uh hi.

12Taciang vantung lalangin, “Vaanglianbelpa TOPA awng, Jerusalem tung le Judah ngam khuapite tungah kum sawm sali sung thin uuk zo ni hi. Amate na hesuak tu bang tan vei hai lai tu ziam?” ci hi.

13Henepna kammal taw vantung lalang tungah TOPA in zo kik hi. 14Taciangin Vaanglianbelpa TOPA pauna taangko tu in vantung lalangin kei hong sawl hi. “Ka khuapi thiangtho Jerusalem atu in thinbotna le itna thukpi ka nei hi, 15taciang kilemna le ngamdaina taw a om ngamte tungah ka thin uuk mama hi. Banghangziam cile ka mite tungah ka thin uukna iip kenkon in ka om laitak tua ngamte in ka minamte thuakna nasia sak seseam hi. 16Tua ahikom Jerusalem khuapi tungah ka hesuakna lak tu in kong pai kik zo hi. Ka Biakinn kipua pha kik tu a, khuapi kisa kik tu hi,” hong ci hi.

17Vantung lalang in TOPA kammal hi teng taangko tu in hong sawl hi. “A khuapite nuamsa kik tu a, ama in Jerusalem khatvei hu kikin, ama khuapi in nei kik tu hi, Vaanglianbelpa TOPA in ci hi,” hong ci hi.

Sakiite Mu kholna

18Mu kholna dang sungah khuital kii li ka mu hi. 19Keima hong paupui vantung lalang tungah “Hi sakiite a khiakna bang ziam,” ci in ka dongh hi.

Ama in “Tuate sia Judah, Israel le Jerusalem mite a kithethaang sak leitung ngamliante a ci nopna ahi hi,” ci in hong zo hi.

20Taciang TOPA in sek a toai naseam pasal li hong lak hi. 21Keima in “Hi mite bang vawt tu in hong pai ziam?” ci in ka dongh hi.

Ama in “Amate in Judah ngam sutham in a mite a thethaang sak ngamte a lau sak tu le a lawnthal tu in hong pai hi,” ci in hong zo hi.

⇑

[Remove Footnotes]