1 Pathian hna-tlaknakin, Jesu Khrih ih tirhkoh ti-ih kawh, keimah Paul, le kan unau Sosthenes * hnen ihsin, [Rm 1:1 ] 2 Lalpa Jesu cu anmah le kanmai' Lalpa a si ti-ih A hmin hlamtu, hmun kipih um zate thawn hmun khatah Khrih Jesui' thianter * mi le, thianghlim dingih kawh mi, Korin ih Pathian kawhhran hnenah, [Jn 17:19 ] 3 kan Pa Pathian hnen le, kan Lalpa Jesu Khrih hnen ihsin, A ngilneihnak le daih nak cu nan hnenah um hram seh, [2Kr 8:9 ]
4 Nanmai' cungcangah Pathian parah ka lungawi camcin, ziangahtile Pathian i ngilneihnak cu Khrih Jesu ah pek nan rak si. 5 cun thil ziangkimah Amah ah vùr nan si, cucu ṭongkam le theihnak tinkimah a si, 6 Khrih i thu kan lo sim mi cu nan sungah a rak fek, 7 cuticun kan Lalpa Jesu Khrih i phuan mi hngakhlap zetih nan hngak tikah, vozem * nan hlawhsam mi pakhat hman a um lo, 8 Anih cun kan Lalpa Jesu Khrih i Ni ah, sawihnawm kailo-in, a cemnet tiang A lo nemhnget ding. 9 Pathian cu rinum a si-ih, Amai' zarah A Fapa, kan Lalpa Jesu Khrih thawi' pawlkawm aw dingih A lo kawh mi nan si.
10 Tunah unau tla, nan zaten lungrual ten nan lakah ṭhen awknak * um hlah seh ti-in kan Lalpa Jesu Khrih hminin ka lo fawrh; cuhnakin nanmah cu thinlung bangaw le, rorëldan bangaw ih tuah famkim mi si hram uh. 11 Ziangahtile nan lakah tawh awknak * a um ti-in, nan cungcangah Khalu tei' sung mi hrekkhatin, unau tla in ra sim. 12 Tui ka ti duh mi cu himi a si, nanmah mi pakhatin kei cu Paul ih lamṭang ka si, kei cu Apollos * lamṭang ka si, kei cu Sifas lamṭang ka si, kei cu Khrih lamṭang ka si nan ti cio, ti a si. 13 Khrih teh ṭhenin a um maw? Nan hrangah Paul teh khenbet asilo, a si maw? Culo ahteh Paul hminih baptis mi nan si maw? 14 Krispas le Gaias siarlo baptis mi ka neih lo ruangah Pathian ka thangṭhat, * 15 keimai' baptis mi sivekin zokhalin rél aw hlah seh. 16 Tunah kei khalin Stefanas tei' inn sungsang ka rak baptis takngai, culo midang ka baptis mi ka thei lo. 17 Ziangahtile Khrih in baptis dingah i tirh lo, asinan thuthangṭha sim dingah i tirh sawn; Khrih ih thinglamtah cu hmual nei lo-ah a can lonak dingah, minung ṭongkam thiamnak tla ka hmang lo.
18 Ziangahtile thinglamtah thu cu hloral lai cuahco hnen ahcun atthlak a si, asinan kannih rundam lai rero mi hnen ahcun Pathian huham a si. [Is 29:14 ] 19 Ziangahtile hitin ngan a si, "MIFIM PAWLIH FIMNAK KA SIAT DINGIH, REMRUAT THIAM PAWLIH REMRUAT MI ZIANGHMAN LO-AH KA CANTER DING," ti-in. 20 Mifim teh khui-ah a um? Dãn zirhtu teh khui-ah a um? Hi sanih thu el thiam teh khui-ah a um? Khawvel fimnak cu Pathian in atthlakah A tuah ngah asilo maw? 21 Ziangtintile Pathian fimnak cu, khaw vel in a fimnak hmangih Pathian a theih ban thei lo zo bangin, thuken sim mi atthlak hmangih a zumtu pawl rundam cu Pathian lunghmui zawng a si. 22 Ziangahtile Judah pawlin hminsinnak hmuh an ngiar taktak; Krik pawlin fim nak an hawl rero fawn, 23 asinan kannih cun Khrih an khenbet thu kan sim, cucu Judah mi hnenah khamtu a si-ih, Krik mi hnenah atthlak a si, 24 asinan Pathian in A kawh mi Judah mi le Krik mi hnenah, Khrih cu Pathian huham le Pathian i fimnak a si. 25 Ziangruangahtile, Pathian ih atnak cu minung hnakin a fim deuh, Pathian cah lonak cu minung hnakin a cak deuh.
26 Ziangtintile u le nau tla, kawh nan si lai-ah ziangvek mi nan si ti ruat hnik uh; taksa lamdãn ahcun mifim tam nan um lo, hu nei langsar khal nan tam lo, mangbawi hrin khal nan tam lo; * 27 asinan Pathian in mifim pawl ning zakter dingah, hi leitlunih thil mumal lo tla A hril hrim, thazang cak thil tla ningzakter dingah, Pathian in leitlunih thil cak lo pawl A hril hrim, 28 leitlunih thil tenau le nautat mi A hril hrimih, um cia mi phiat hlo dingah, um hrih lo mi Pathian in A hril riangri, 29 culawngah Pathian hmai-ah zohman a uang aw lo ding. 30 Asinan cuti-in A tuah zarah, nanmah cu Khrih Jesu ah nan um, Amah cu kan parah Pathian ihsi kan fimnak, kan felnak, kan thiannak le kan tlen awknakah a cang. 31 "ZOKHAL TLUANGKHAWNGTU CU LALPA AH TLUANGKHUANG SEH" ti-ih ngan a si.
