1 Paul le Silvenas le Timothe in, Pa Pathian le Lalpa Jesu Khrih i um Thessalonika kawhhran hnenah, ngilneih nak le remnak um hram seh.
2 Thla kan cam tikah nan hmin sãlin nan zate hrangah Pathian hnenah lungawi thu kan sim ṭheu; 3 kan Pa le Pathian hmai-ah rinnakih nan ṭuan mi le, duhdawtnakin law zetih nan ṭuan retheihzia le, kan Lalpa Jesu Khrih beisei in nan tuarfaizia tla hngilh lo-in lung sungah kan cing ringring, * 4 Pathian i duhdawt mi, unau tla, Amah in A lo hril * ti thei in; 5 ziangahtile kan thuthangṭha cu thu men lawngin nan hnenah a thleng lo, huham, Thlarau Thianghlim le pom hngetnak thawn a thlengih, nan hma sialin nan hrangah ziangtivek minung kan si ti nan thei. 6 Cui thu harsatnak maksak tuar cingin, Thlarau Thianghlim peknakin lungawi ten nan pawmih, nanmah khal kanmah le Lalpai' nun latu nan cang. [Tr 17:5-9 ] 7 cuticun, Masidonia le Akhaiah ih zumtu zatei zohṭhim tlak nan cang. 8 Ziangahtile Lalpai' thu nan sim mi cu Masidonia le Akhaia lawngah thang lo-in, Pathian nan rinnak cu hmun kipah theih thluh a si ti cu zianghman kan rël a ṭul lo. 9 Ziangtintile anmah rori in kan cungcang an rël mi cu, ziangtluk ṭha in nanmahin in zoh ti anmah rori'n in rak sim, a nung mi le a dik mi Pathian rian dingin milem biaknak ihsin Pathian ah ziangtin nan ṭhawn ti tla thei ko in ra sim, 10 aithawhnak ra thleng lai ding ihsi in humhimtu, mithi A kaihthawh mi , cucu Jesu a si, A Fapa cu vancung ihsi hngak dingah a si.
