1 Pathian hnatlaknakin Khrih Jesui' tirhkoh Paul le, kan unau Timothe in, Korin i Pathian kawhhran le Akhaia ram hmuahhmuah-ih mithiang zate hnenah: 2 kan Pa Pathian le, kan Lalpa Jesu Khrih hnen ihsin ngilneihnak le daihnak nan hnenah um hram seh.
3 Zangfahnak Pa le ziangkimih hnangamtu Pathian a simi kan Lalpa Jesu Khrih ih Pathian le Pa cu thangṭha ko seh; 4 Tunah tuah nat kan sinak hmuahhmuah ah in hnemtu Amah a si bangin, kanmah khalin harnak tuartu pawl Pathian ih in hnemnakin kan hnem ve theinak dingah a si. 5 Ziangahtile Khrih i tuarnak kan parih a luangliam bangin, mi kan hnemnak khal Khrih zarah luang liam ve ding a si. * 6 Asinan tuah nat kan sile, himi cu nan thla ngamnak le rundam nan sinak dingah a si, culole kanmah in thla-ngam asile, nanmah cu thla-ngam si ve dingah a si, cucu kanmah khalin tuah nat kan tuar mi bang awah thinsau ihtuar a ṭha-hnem tinak a si; 7 nan hrangih kan ruahsan mi cu a fek zet, cucu kan tuarnakah in tuarpi ti kan theih bangin, kan hna-ngamnak khalah in ṭawmpi ve. 8 Ziangahtile u le nau, Asia ramih tuah nat kan tawn mi cu thei lo menih nan um kan duh lo; kha-ti-tluk nasa-ih nehsawh kan si taktak, kan tuar thei lo lengin a si bangin, nun hman ring aw lo tiangin kan beidong; 9 kanmahte rinsan aw lo-in, cuhnakin mithi kai thotu Pathian rinsan dingin kanmahah thihnak thu rel catcia bangin kan si taktak; 10 Amah in kha-ti-tluk thih phãn-umza ita in rak humih in hum vivo lai ding, Amai' parah kan beiseinak kan ṭhum. Anih cun in hum vivo lai ding, 11 nannih khalin thla nan camnakah bawm in in rak kawpi ih kan parih mi tampi ih thlacam mi hmangin kan parih duhsaknak in voh mi zarah kanmai' aiah mi tampi in lungawi thu an sim thei ding.
ṭ ulh san
12 Ziangtintile calhngal-ih tluang kan khawn sannak cu, sia-le-ṭha theihnak hmangih kan tawn mi kan relnakah, thianghlim le hawizawngtei' pathian ngaih sak mi sinakin kan nungcangih, tisa- mihring fimnakin a si lo, cuhnakin ngilneih nakin a si deuh, leitlunah kanmahte hawi zawngin kan um, a hleicein nanmai' lamah a si bik. 13 Ziangahtile nan siarih nan theih thiamlo mi thu zianghman kan ngãn lo, a cem net tiang nan theihthiam kan beisei; 14 nanmah khal Lalpa Jesui' ni-ah kan tluangkhawnnak le, kan aipuannak nan si bangin, kannih khal nan tluangkhawnnak san bik kan si ve ti cu nanmah khalin tawkfang in theihpi.
15 Hi cal-hngalnakah a let hnihin nan hlawk theinak dingah, a hmaisa bikah nan hnen ra tlawn ka tum; 16 cucu, Masidonia ka tlawn ṭumah rak lo pal phah sehla, cuisin Masidonia ihsin nan hnenih ka kir leh tikah, Judia ka fehnakah in thlah cih thei ding. [Tr 19:21 ] 17 Cuiruangah hitivekih tuah ka tum tikah, awlsam menin tuah ka tum, a si maw? Culo ahteh, ka tum tikah tisa takin maw ka tumtah, cãn khatah, "A si ti thul, a si lo ti thul dualdo maw ka si?" 18 Asinan Pathian cu rintlak a si bangin, nan hnenih kan ṭong mi cu, 'asi,' 'asilo' ti thul dual do a si lo. 19 Ziangahtile nan lakih keimah, Silvenas le Timothe in kan lo sim mi Pathian Fapa Khrih Jesu cu, a si ti thul, a si lo ti thul dual do si lo-in, Amah ah kumkhua a si cu a si ti a si ringring. [Tr 18:5 ] 20 Pathian ih tiam ta mi ziangzat tam a si khal le, Amah ahcun a si ti hlir an si; cuti a si bangin, kanmah ihsin Pathian sunlawinak dingah Amai' zarah "Amen," kan ti a si. 21 Tunah nanmah thawn Khrih ah kanmah in hngettertu le hriak in thihtu cu Amah Pathian a si, 22 Amah in kam awknak tacik in khenih, hamnakah kan thinlung sungah Thlarau in pe,
23 Asinan Korin ih ka kir lonaksan cu, nanmah zuah dingah a si ti Pathian cu ka nun * theihpitu ah ka ko. 24 Cucu nan rinnak parih lal duhah asilo, cuhnakin nan thinnawmnakih hna ṭuan tlang dingah a si, ziangahtile, nan rinnakah nan dingfek lai.
