[1:1-12:24 ] 1 Tucun lal David a upa thlangih a tar; puan an sin cingin a khua a hlum thei lo. * [2Sam.5:4 ] 2 Cun a siahhlawh pawlin a hnenah, "Ka bawi siangpahrang hrangah fala him no kan hawl dingih, kil sehla amah tuam hlawmtu siseh; cuisin a ṭangah zau sehla ka bawi siangpahrang a hlum deuh ding," an ti. 3 Cuisin Israel ram pumpi ah fala no-nal hmelṭha an hawl sak, Shunam mi Abishak an tongih, siangpahrang hnenah an hruai. * 4 Cui fala tleirawl cu a mawi zet; amah cu siangpahrang tuamhlawmih riantu asinan cunu cule siangpahrang thawn an pawl aw lo.
5 Tunah Hakkith fapa Adonijah cu amah te a cawisang aw, "Keimah cu siangpahrang ka si ding," a ti. Cuhrangah a hmai-ah rangleng le rang parto sawm nga tiar cia in a timlam. * [2Sm.5:4 ;15:1 ] 6 A pa-in ziangtik hmanah, "Ziangruangah hitivekin na tuah?" ti-in a ti dah lo. Anih khal hmelṭha zet a si-ih, Absolom hnu ah a suak. [2Sm 3:3 ,4] 7 Anih in Zeruiah fapa Joab le puithiam Abiathar thu a rawn; Adonijah thlun in amah an bawm. * 8 Asinan puithiam Zadok, Jehoiada fapa Beniah, profet Nathan, Shimei, Rei, Mikah, cu David kiltu ṭha bik an si-ih, Adonijah an rak thlun ve lo. * [2Sam.8:18 ] 9 Adonijah in Enro-gel kiangih Zoheleth ah tuu, cawcang, rannung thau a thatih; a unau zate le siangpahrang fapa zate, le lal hrin bawi Judah mi zaten a sawm. *
10 Asinan profet Nathan, Benaiah le a unau Solomon a sawm ve lo.
11 Cule Nathan in Solomon nu Bathseba hnenah, "Kan lal David theih lo-in Hakkith fapa Adonijah siangpahrang a cang ti na thei maw?" ti-ah a sut. * [2Sm.12:24 ] 12 "Cuti-in tunah ra awla, na nunnak na hum ding dan le na fapa Solomon nunnak na hum thei ding dan ka lo ngaihtuahpi ding," a ti. 13 "David siangpahrang hnenah feh loh li awla, "Ka siangpahrang, ka leh hnu ah na fapa Solomon in siangpahrang a ṭuan teng teng dingih, ka lal tohkham ah a to ding ti-in na salnu ka hnenah sesam in i tiam ta a si lo maw? Ziangruangah Adonijah leh-lam lal a cang? ti-ah sim hnik aw," ti-in a cah ta. 14 "Ngaihman, cuti-ih siangpahrang na biak lai-ah kei khal ka lo thlun dingih, na sim mi thu pawl ka hngetter ding."
15 Cuisin siangpahrang ihnak pindan sungah Bathsheba a lut.Tucun siangpa hrang a tar zet thlangih, Shunam mi Abishak in a zutmet rero. 16 Cule Siangpahrang hmaiah Bathsheba a kuunih leisin bihin a bawkkhup. Siang- pahrang in, "Ziang na pawi?" ti-ah a sut.
17 Cunu-in a hnenah, "LALPA na Pathian hmin salin na siahhlawh i sim mi cu," Ka leh hnu-ah na fapa Solomon in siang- pahrang ṭuan tengteng sehla, ka lal tohkhamah to seh," ti-in sia na sam. 18 "Asinan tunah ngaihman, Adonijah leh- lam siangpahrang a cang thlang ti ka bawi siangpahrang in na thei lo. 19 "Cupa-in cawcang le cawmthau tuu tam zet a thatih, siangpahrang fapa zate, puithiam Abiathar, ralkap hotu ralbawipi le Joab tla a sawm; asinan na siahhlawh Solomon a sawm tel ve lo. 20 "Tunah nang cu, ka bawi siang pahrang, nang cu tunah Israel mi zatei' an lo thlir lai tak asiruangah na leh hnuih lal tohkhamih to ding cu zo a si ding ti in sim ta aw," a ti. 21 "Culo asile ka bawi siangpahrang cu a pu-le hnenih a ihthat veten kei le ka fapa Solomon cu thi-tlak sual nei vekin in tuah riangri ding," a ti.
22 "Cun ngaihman, cuti ih lal hnenih a ṭong lai-ah profet Nathan a rak lut ve. 23 Annih in lal hnenah, "Hinah profet Nathan a um ti-ah an sim. Lal hmai a thlen tikah leisin-bihin leilungah a bawkkhup. 24 Cule Nathan in, "Maw ka bawi siang pahrang, ka leh hnu ah Adonijah siangpa- hrang cang sehla, ka lal toh khamah to seh na ti maw?" ti-in a sut. 25 "Ziangahtile tui sunah a suk thla ih cawcang, cawm thau le tuu tampi a thatih a thawi aw. Siang pahrang fapa zate, ralkap hotu ralbawipi le puithiam Abiathar a sawm, tunah amah thawn an ei-ih an in tlang lai tak asi; siang pahrang Adonijah a nun khua sau hram seh! an ti rero," ti-ah a sim! 26 "Asinan na siahhlawh kei le puithiam Zadok, Jehoiada fapa Benaiah le na siah hlawh Solomon an sawm tel lo. [1:8 ,10,32] 27 "Hi thil hi ka bawi siangpahrangih tuah mi asinan na leh hnu ih na lal toh khamih to ding na siahhlawh na theiter lo maw si?" ti-ah a sut.
28 Cule David siangpahrang in, "Bathseba i kawh sak uh," ti-ah a sang. Cun lal umnakah a lutih, siangpahrang hmai-ah a rak ding. 29 Cun siangpahrang in sesam in, "Har satnak zozai sung ihsin ka nunnak i humtu LALPA A nun bangin, [2Sm.4:9 ; Rut.3:13 ] 30 Israel Pathian LALPAI' hmin in na hnenih sia ka sam cia bangin, "Na fapa Solomon in siangpahrang ṭuan tengteng sehla, ka ai-awhin ka umnak lal tohkham ah to seh ka ti bangin tunah ka tuah ding," a ti. 31 Cule lal hmai-ah leisin bihin Bathsheba a bawkkhup ih upat a pe, "Ka bawi David siangpahrang cu kumkhua nung hram seh, a ti. [Neh.2:3 ;Dn.2:4 ;3:9 ;5:10 ]
32 Cule Siangpahrang David in, "Puithiam Zadok, profet Nathan, Jehoiada fapa Benaiah i kawh sak uh," a ti. Cun lal hmai-ah an ra thleng, [1:26 ] 33 Siangpahrangin an hnenah, "Nan bawi siahhlawh pawl hruai uhla, ka fapa Solomon cu ka to mi rang parah toh uhla, Gihon ah hruai suk uh," ti-ah a fial. [2Sm.20:6 ; Est.6:8 ] 34 "Cutawkah puithiam Zadok le profet Nathan in Israel parih siangpahrang si dingah hriak thih uhla, tawtawrawt phaw uh, 'Siang pahrang Solomon cu kumkhua nung hram seh! ti-in au uh," a ti. 35 "Cule a dungah nang khal feh aw, ra sehla ka ai-ah lal ṭuan sehla ka lal tohkhamah to seh; ziangahtile amah cu Israel le Judah tlunih uktu ah ka ret," a ti. 36 Jehoiada fapa Benaiah in siangpahrang a sim mi cu, "Amen! ti-in a sang. Ka bawi siangpahrangih Pathian, cui' LALPAI' in cutin ti hram seh," a ti. 37 "Ka bawi siangpahrang tlunih LALPA A um bangin, Solomon parah um sehla, a lal tohkham cu ka bawi David ih lal tohkham hnakin cungung deuh seh!" a ti.
[1San 29:22 ]
38 Cuisin puithiam Zadok, profet Nathan, Jehoida fapa Benaiah, Kereth mi le Peleth mi thawn an sukih, Solomon cu David ih to mi laak parah an toterih Gihon ah an hruai. 39 Cule Puithiam Zadok in biakbuk thiang sungih hriak thawl a lakih, Solomon a thih. Cule tawtatawt an phaw ih mipi zaten, "Siangpahrang Solomon a nun khua sau hram seh!" ti-in an au. * 40 Mipi zaten a dungin an so-ih phirivau, phenglawng tum in aipuang fa hranin an fehih a thawmvangin leilung a hngawr.
41 Tunah rawl an ei khawpin Adonijah le a mikhual pawlin cui thawmvang an thei. Joab in tawtawrawt awn a theih tikah, "Ziang ruangah khawpi sungah cutluk a thawm luih lo?" ti-ah a sut hai. 42 Cuti-ih a ṭong laiah ngaihman, puithiam Abiathar fapa Jonathan a ra thleng. Cun Adonijah in" Rung lut phah hnik, nang cu mi-hrat khawkheng na si-ih, thuthang in sum ko ding," a ti. * [2Sm 15:26 , 27;17:17 ; 18:27 ] 43 Asinan Jonathan in Adonijah hnenah, "Kan bawi siangpahrang David in Solomon cu siangpahrangah a tuah thlang," ti-in a sang. 44 "Cun siangpahrang khalin puithiam Zadok, profet Nathan, Kereth mi Jehoiada fapa Benaiah a thlahih siangpahrang ih to mi laak parah amah an toter," a ti. 45 "Cun puithiam Zadok le profet Nathan in Gihon ah siangpahrang dingah hriak an thih thlangih, khawpi sung thawm het het tlakin cutawk ihsin aipuang zetin an so. Himi hi thawm nan theih mi a si," a ti. 46 Cuitlunah, lalramih lal tohkham par ah Solomon in tonak a la . * [1San.29:23 ] 47 "Cuitlunah kan bawi David thlaza cam dingin lal siahhlawh bawi an so-ih, "Solomon hmin cu kan Pathian in na hmin hnakin ṭha deuhin tuah sehla, a lal tohkham cu na lal tohkham hnakin cungnung deuh seh! ti-in an lawmpi. Siangpahrang cu ihkhun parah a lu a kuun. [1:37 ] 48 "Siangpahrang in hiti khalin a sim, "Tui sunah ka mit hmuh lai-ah ka lal tohkham parih tonak petu LALPA, Israel Pathian cu thlawsuak hram seh, " ti-in. *
49 Cule Adonijah ih mikhual zaten an thin phangih; an thawkih innah an tin cio. 50 Adonijah cu Solomon ṭih in a thawkih, maicam ko pawkin a ding. * [cf.2:28 ] 51 Tunah hitin Solomon an sim, "Ngaihman, Adonijah in lal Solomon a ṭih, zohhman maicam ki a pawkih, "Tui sun ah lal Solomon in ralnam in a siahhlawh thi ko ka tuah lo ding ti-ah sia sam seh," ti-in a cah. 52 Solomon in, "Ṭhathnemnak a neih asile, leilung parah a sam phang khat hman a tla lo ding; asinan sualralnak ka hmuh asile a thi ding," a ti. 53 Cuisin lal Solomon in mi a thlahih, maicam ihsin an rak hruai, a ra thlen tikah lal Solomon hmai-ah a bawkkhupih Solomon in," Na innah tin aw," a ti.
