Paul nih Timote ca a kuatmi pahnihnak hi, pumpak in lungthin a cheuhmi a si bik. A biapi bik cu, in khawhnak lungthin ngeih a herhning kha a si. Timote cu Jesuh kong kha zumh awk tlak tein chim zungzal i Thawngṭha biatak kha fek tein i tlaih i harnak le sifahnak lakah cawnpiaktu le Pathian phungchimtu si khawh i zuam kha a forh.
Paul nih lungthin a cheuhmi chungah hin fak khun in rak ruat seh ti a duhmi cu, mi ṭhatnak zeihmanh a chuahter ṭung lomi, mi rawhnak lehlam a chuahtertu bia alnak, hruh bia alnak ṭihnung a sining kongah ralrinnak a pekmi kha a si.
Paul nih Timote biacah a duh bikmi cu, harnak le hremnak le sifahnak ka inmi chung i zumhnak le lungsaunak le dawtnak le thlachiat ruahnak ka ngeih bantuk hin, nang zong ngei ve, ti hi a si.
| Tlangpi Hna | |
|---|---|
| Biahmaiṭhi | 1.1-2 |
| Thangṭhatnak le forhnak | 1.3—2.13 |
| Lungthin cheuhnak le ralrin peknak | 2.14—4.5 |
| Paul nih a ton liomi | 4.6-18 |
| Biatlangkawm | 4.9-22 |
1Khrih Jesuh he kan i pehtlaihnak thawngin Pathian nih a kan kamhmi nunnak kan hmuhmi kong chim awkah thlahmi keimah Paul, Pathian duhning in Khrih Jesuh lamkaltu a simi nih, 2ka dawtmi ka fa Timote, ca kan kuat.
Pathian kan Pa le kan Bawipa Khrih Jesuh nih vel lezaangfahnak le daihnak in pe ko seh. *
3Kan pupa hna nih an rak biak bantukin kei zong nih lungthiang tein ka biakmi Pathian cu, chun he zan he ka thlacamnak i nangmah kan theih fate, ka lawmh zungzal. 4Na mitthli kha ka philh lo i lunglawmhnak in ka khah nakhnga nangmah hmuh cu ka duh hringhran. 5Na pi Lois le na nu Zunis nih an ngeihmi zumhnak bantuk, zumhnak taktak na ngeih kha ka hngalh i atu zongah hin na ngei ko tiah ka zumh. * 6Cucaah na cung i ka kut ka rak chuan tik i Pathian nih an pekmi laksawng kha na nunter peng nakhnga chimh ṭhan kan duh. 7Pathian nih a kan pekmi Thlarau nih cun mi ralchia ah a kan ser lo, ṭhawnnak le dawtnak le mah le mah i uk khawhnak tu khan a kan khahter.
8Cucaah kan Bawipa kong chim cu na ningzak hlah, a ca i thongtlapa keimah zong hi ka zahpi hlah. Pathian nih thazang an pekning in Thawngṭha ca i temhnak in kha ngamh lehlam ko. 9Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si. Hi a vel cu caan hramthawk hlan in Jesuh Khrih in a kan pek cang, 10sihmanhsehlaw atu ceo ah hin kan Khamhtu Khrih Jesuh a ratnak thawngin cucu kan sinah phuan a si. Thihnak ṭhawnnak kha a donghter cang i thih thiam ti lo nunnak cu Thawngṭha in kan sinah a phuan cang.
11Cu Thawngṭha thanhtu dingah Pathian nih lamkaltu le cawnpiaktu ah a ka ser i * 12hi bantukin sifahnak ka inmi vialte hna hi, hi ruangah hin a si. Asinain ka lung a dong naisai lo, zeicahtiah kaa bochanmi cu ahodah a si kha ka hngalh i ka kut chungah a ka pekmi thil kha khi Ni tiang him tein a ken khawh ti kha fiang tein ka zumh. 13Kan cawnpiakmi biatak kha fek tein i tlaih hna law na zulh awkah i chiah hna, cun Khrih Jesuh he kan i pehtlaihnak thawngin kan ta a simi zumhnak le dawtnak chungah khan um peng ko. 14Kan chungah a ummi Thiang Thlarau ṭhawnnak thawngin na kut chungah chiahmi thil ṭha kha him tein keng hna.
15Asia ram chung i a ummi nih an dihlak in an ka zamtak ti kha na hngalh, cu hna lakah cun Figelas le Hermogenes zong an i tel. 16Onesiforas nih voi tampi ka lung a ka lawmhter caah Pathian nih a innchungkhar cu zaangfahnak pe ko hna seh. Thong ka tlak kha a ka zahpi lo, 17Rom khua a phak cangka, a ka hmuh hlan lo a ka kawl. 18Khi Ni ah Bawipa sin in zaangfahnak a hmuh nakhnga a caah thla ka cam. Cun ka caah zeitluk in dah Efesa khua ah rian a ṭuan ti kha na hngalh.
