Job cauk chungah hin miṭha a simipa, harnak le sunghnak a ingmi kong a um — a fale zong an thi dih, a ngeihmi thil vialte zong an lo dih i fih awk a simi zawtnak nih a tlunh. Cun hi cauk a ṭialtupa nih, zeitindah Job le a hawile nih khan hi thil kong hi an hmuhning a si ti kha hla bia in a chim. A donghnak ah Pathian zong kha a rung lang ve a ti.
Job a hawile hna nih khan Job nih nganfahnak a in cu a phung tawn ningin an hrilhfiahpiak. An tining ah cun, Pathian nih cun ṭhatnak kha a duh i laksawng in a lehrulh tawn, sihmanhsehlaw chiatnak cu a huat i dantatnak in a lehrulh tawn, cucaah hi bantukin Job nih dantatnak na in hi ṭhat lonak na ngeih ruangah a si hrimhrim ko lai, ti a si. Sihmanhsehlaw hi hrilhfiahnak cu Job caah cun a puan tuk, zeicahtiah Job cu miṭha ngai a si ṭung i an tining a si ahcun dantatnak si loin laksawng tu kha a hmuh awk a si, sihmanhsehlaw a inmi le a hmuhmi cu dantatnak fak ngai kha a si ṭung. Cucaah cun cu bantuk i a ṭha komi cungah cun zeitindah Pathian nih cun harnak cu a tlunter kun hnga ti kha a ruah in a ruat kho lo i cucaah cun Pathian hmanh kha, hi thil hi fianter tiah a zuam cawh.
Pathian nih khan Job biahalnak cu a let lo, sihmanhsehlaw zeizong vialte tuah khotu a sinak le zeizong vialte hngal dihtu a sinak kha Job cu a hngalhter i cu nih cun Job kha a lung hna a ngamh; cu tikah Job nih khan biahrang le biadawhlo a hmanmi hna zong kha aa ngaihchih ṭhan hna.
Job cu a donghnak ah cun a lianngan ṭhan i hmasa nak hmanh khan a ngan deuh. Job nganfah innak sullam an hngalh khawh lo ruangah khan Pathian nih Job hawile kha a mawhchiat hna. Job lawnglawng nih kan biak tawn ningin kan biaknak le kan hrilhfiah tawn ningin kan hrilhfiahnak nak hin Pathian cu a ngan deuh ti kha a hngalh.
| Tlangpi Hna | |
|---|---|
| Hramthawknak | 1.1—2.13 |
| Job le a hawile hna | 3.1—31.40 |
| a. Job phunzainak | 3.1-26 |
| b. Biaruahmi pakhatnak | 4.1—14.22 |
| c. Biaruahmi pahnihnak | 15.1—21.34 |
| d. Biaruahmi pathumnak | 22.1—27.23 |
| e. Fimnak thangṭhatnak | 28.1-28 |
| f. Job biadonghnak | 29.1—31.40 |
| Elihu biachimnak | 32.1—37.24 |
| Bawipa nih Job a leh | 38.1—42.6 |
| Donghnak bia | 42.7-17 |
1Uz ram ah hin mipa pakhat a min Job a simi a rak um; cu pa cu soisel awk um lo, miding, Pathian a ṭih i ṭhat lonak kha a hrialmi a si. 2Amah nih cun fapa pasarih le fanu pathum a hrin hna. 3Cun tuu thong sarih, kalauk thong thum, cawtum tuah za nga, cun laapi za nga le sinum tam ngaingai a ngei; cucaah hi pa cu nichuahlei mi vialte lakah a lianngan bik a si. 4Cun anmahle an inn cio ah a fapa hna nih khan, an ni cio ah, rawl danghnak kha i chawng lengmang in an tuah tawn i an sin i ei awk le din awkah an farle pathum kha an sawm tawn hna. 5Cun an puai kha a dih tikah Job nih khan a auh hna i a thianh hna; zingkate in a tho i an milu tlingte khan khangh thawinak a pekchanhpiak tawn hna; zeicahtiah Job nih cun aa thawh i, “Ka fapale hna nih hin sualnak an tuah ko hnga i an lung chungin Pathian kha an vawlhpamh ko hnga,” tiah a ti. Cuticun Job nih a tuah lengmang tawn.
6Cun Pathian fapa hna cu Bawipa hmai i an chuah ni a hung phan i Satan zong an sinah cun a ra ve. * 7 Bawipa nih Satan cu a thawh i, “Khuazei in dah na rat?” tiah a ti. Satan nih cun a leh i, “Vawlei cung khuazakip i kaa chawhnak le kaa lehnak in,” tiah a ti. 8Cun Bawipa nih Satan cu a thawh i, “Ka sal Job hi na ruat bal maw? Vawlei cungah hin amah bantuk soisel awk um lo, miding, Pathian a ṭih i ṭhat lonak a mertakmi hi an um lo,” tiah a ti. 9Khi tikah Satan nih Bawipa cu a leh i, “Job nih hin Pathian cu a lak in maw a ṭih? * 10Amah le a inn le a ngeihmi vialte cu hau in na kulh hna lo maw? Nangmah nih a kut rianṭuannak cu thluachuah na pek i ram chungah hin a ngeihmi thil cu an karh. 11Sihmanhsehlaw atu cu na kut hei chuah law a ngeihmi thil vialte khi tawng tuah ngat, na hmai hrimhrim ah an vawlhpamh ko lai,” tiah a ti. 12Cun Bawipa nih Satan cu a thawh i, “Zohhmanh, a ngeihmi vialte cu nangmah kut chungah an um; amah taktak belte na kut cun tawng hlah,” tiah a ti. Cucaah Satan cu Bawipa hmaika cun a chuak.
13Ni khat cu a fapale hna le a fanule hna cu an upa bik inn ah rawl an ei i mitsur hang an ding; 14cun zualko pakhat kha Job sinah cun a ra i, “Cawtum hna cu lei an thuang i laa hna cu an pawngah an tlong; 15cun Seba mi hna nih an chuahhnawh hna i an lak hna i na sinum hna kha vainam in an thah hna; cun keimah lawnglawng hi nangmah chimtu dingah ka luat,” tiah a ti. 16Cun bia a chim lengmang lioah cun a dang pakhat a ra i, “Pathian mei cu van in a rung tla i tuu le sinum kha a kangh hna i a thah hna; keimah lawnglawng hi nangmah chimtu dingah ka luat,” tiah a ti. 17Cun bia a chim lengmang lioah cun a dang pakhat a ra ṭhan i, “Khaldi mi hna cu bu thum in an i ser riangmang i kalauk kha an nam hna i an lak hna i sinum hna kha vainam in an thah hna; cun keimah lawnglawng hi nangmah chimtu dingah ka luat,” tiah a ti. 18Cun bia a chim lengmang lioah cun a dang pakhat a ra ṭhan hoi i, “Na fapa hna le na fanu hna cu an upa bik inn ah rawl an ei i mitsur hang an din lioah 19zohhmanh, ramlak lei khin thli fakpi a hung hrang i inn cu a ki li in a den i seino pawl cungah cun a tla i an thi dih; cun keimah lawnglawng hi nangmah chimtu dingah ka luat,” tiah a ti.
20Khi tikah Job cu a tho i a puan kha a thleh i a lu aa kawngh i vawlei ah a bawk i Pathian kha a biak. 21Cun aa thawh i, “Ka nu paw chungin taklawng in ka chuak i taklawng in ka kir ṭhan lai; Bawipa nih a ka pek i Bawipa nih a lak ṭhan; Bawipa min cu thangṭhat si ko seh,” tiah a ti.
22Hi vialte ah hin Job nih sualnak a tuah lo i Pathian cu a mawhchiat lo.
