Yesu Ju" Phyo' Qhug' Ru

(Mrk 1:12-13; Luk 4:1-3)

¹Ai:thao re yui: yang ju" phyo' ru qhug' vashao: ga: Gyang" Lho" Byo wa Yesu re din" pyad' yo khyo jhui" vao ye" ra". ²Byid xe myi byid xe ba zo: ve jao" thao re- Yesu wa vae: moe' ra". ³Alao" yui wa Yesu jhao" li" mung: Nao Mao"So: Yao: Zo: ngad: re wa ce:laug baui jham re mug boe" li" geshao: amyin" byid: wa, ga: ta" ra".

⁴Ngad qere: Yesu wa tau: mung:- Byu wa zo: ve: yang za: kao so' qo" daui: na: ru mangad:- Mao"So: nhad' mae thug' li" ra" dao: thoe: yang za: kao so' qo" daui: na nae" ngad: ra" ga: jham: mug sug' mae tung" to" ra"- ga: ta" ra".

⁵Alao" yui wa Yesu re gyang" lho" ra" vogaung: mo" Yerusalem khyo jhui: lo mung: pa" caung: yham mae" khaung nho thao mae yhe' to: mung: ⁶Yesu re Nao Mao"So: Yao: Zo: ngad: re wa mho: khyo byae: gyo" lo" wa,- Pe"mung:ga"re jham: mug sug' mae

• Mao"So wa nao re lhaug' zaung" byid: nae" qhid' mae" Mug:Lagyo: jham re amyin" byid: mung: yao: bam wa-
• laug baui dao ni" khyid lhao" mathaung" cad' vashao:-
• Yao: bam: lo; yang: lham: vo; yu: li" genae" ga: tung" to" ra"- ga: ta" ra".

⁷Yesu wa tau: mung:- Ai: Asang ni" Mao"So re nao magai: jham" qu" nae" ga: re: tung" to" ra" ga: ta" ra".

⁸Ai mae" yui wa Yesu re gyai myhao: ra" bam khyo jhui" do, lo" mung: myid gaung dao mae" mung" dan: alhab' we' ai: mung" dan: jham: phung qab bao re ceim" shid' mung:- ⁹Nao Ngo re goe; pa" ngad: re wa ce: gu: alhab' ngo nao re byid: nae" ga: Yesu re ta" ra".

¹⁰Yesu wa tau:- mung: Satan: we"- thug' lo" wa,- Asang ni" Mao"So re za: nao goe; pa" mung: Yao: re za: caung da" nae" ngad: ra" ga: jham: mug sug' mae atung" to" ra" ga: ta" ra".

¹¹Alao" yui wa Yesu mae" thug' lo" byaug: ra". Ai: thao re Mug:Lagyo: jham li" caung da" byid' ako".

Galile Mung" Mae Yesu Yao" Mau" Zo" Zaui" Qhid: Ru

(Mrk 1:14-15; Luk 4:14-15)

¹²Yesu wa Yohan re thaung: taung" lhaung" pye' va" ga" rure the' gyo: lao"- Yao: wa Galile mug: khyo thug' ye" lo" ra". ¹³Yao: wa Nazaret mae maye: na lo: Zebulun we' Nabthali mug: gyo:- Galile tham: yae mae" Kaperna-um vogaung: mae yena: ra". ¹⁴Ceru: kad' ru wa Lapa Esaia ta" to" ra" dao: jab byang" li" nae" qhid' mae" ngad: ra".

• Yodan: gyaung: thoete' Galile tham: khyo- joe" ra" khyo cao" yang:
• taung bug qe na: ra" mug: Galile we"-

• bo" bao qi: re the' myao: li" genae"-
• Amung: shid: ra" mug: cad' khug mae na: ra" mo; dao mae
• ai: bo" bao wa bao: li" nae" ga: ta" to" ra".

¹⁷Ai: au: mae" Yesu wa Nao=nhaung" myid tha" ge,- Pe"mung:ga"re mug: gaung: mung" dan: wa jhao" li" na va"- ga: yao" mung dao: re kho" kyo" ra".

Ngo: Kung" Zo: Byu Byid Yaug Re Yesu Khai: Yu Ru

(Mrk 1:16-20; Luk 5:1-11)

¹⁸Yesu wa Galile tham: yae cao" yang: su" lo" na: au:- ngo: kung" zo: byu ngad: ra" Petru ga: mang: ra" Simun we' yao: nhaung: Andre tao wa tham: mae geim pye' na: ko" rure yao: myao: ra". ¹⁹Alao" Yesu wa yao: tao re Nga" thao cao" ge,- ngo ni" shid' tao re byu kung" byu boe" nhao nae" ga: ta" ra". ²⁰Alao" yao: shid' tao wa geim jham re to" pye' co' mung: yao: jhao" cao" ako".

²¹Yesu wa ai: tau mae" dam: su" ye" lo" re gatau danhae tao ngad: ra" Zebedi yao: zo: Yaku we' yao: nhaung: Yohan tao re myao: ra"- Yao: tao wa lha dao mae yao: pho" Zebedi we' daga"- yao: bam: geim jham re pho: na: ako". Yesu wa yao: shid' tao re yao" thao cao" nae" qhid' mae" khai: ke' ra". ²²Ailao" jao" yao: shid' tao wa lha we' yao: pho" re to: co' mung: yao: jhao" cao" ako".

Yesu Mho' Shid' Kho" Kyo: Ru We' No Phyo: Gai Byid' Ra" Khyo

(Luk 6:17-19)

²³Amung: Yesu wa Galile mung" geim" jao: sho' du" qin" mung: Tarha" Jung Yham jham mae mho" shid' byid' ra". Mung" dan" ra" ngaui bau" lau dao: gai re kho" kyo: mung:- no phyo: aja: ja: qhug' ra" mo, re we' no aja: ja: de; ra" mo, byu qere gai byid' ra". ²⁴Yao" khyo re Suri mung" geim" jao: sho' hau" nhao" lo" ko" ruyang mo, byu qe wa no phyo: qhug' ra" mo,- no aja: ja: de, ra" mo,- khai" nho mo,- yui zaung mo,- ngho' be, mo,- gaung ajam: shid mo, re yao: jhao" jhui" li" ako". Alao" Yesu wa yao: bam: no re gai byid' ra". ²⁵Alao" Galile" mung"- Dekapoli mung"- Yerusalem Yuda mung" we' Yodan: gyaung: thoete' mae" byu phung: mo" Yesu thao cao" ako".