Korinthu Bao: re Polu tung" vhin: ke' ra" vhin tung" shid' lam: ein: lam: wa- yao: we' Korinthu vogaung: phung: byu qe jho" zam" khug: ru mae aqug: akhai: boe" ra" ayo, gyo: mae tung" ra" vhin tung" ngad: ra". Ai: phung: byu qe mae" damyo" wa- Polu re gyai thin: ra" khyo" gye kad' ta" phoe ko" rure de: de: za: qo" myao: ra". Ngad qere: Polu wa ai bam we' dam: jho" nyang nae" gyai myid kao bau: ru we' ai ru: dam: jho" nyang lao"- yao: gyai ngaui bau" ra" khyo re tung" to" ra".
Vhin tung" sao qhid' dau mae Korinthu vogaung: phung: byu qe we' jho" zam" khug: ra" khyo we' sin: yang: yao: re roe" yang: ta" phoe ko" ra" mo, re we' phung: khug mae gye kad' ko" ra" mo, re pe" mung: gyai thin: ra" khyo" dao: phaug' ta" ke' ra" khyo re ta" sho' kyo: mung:- Airu: gyai thin: ra" khyo" dao: phaug' ta" ke' ruyang ai bam re myid tha" lo nhao: ru we' yao: wa yao: bam we' dam: jho" nyang: ru qhug' yu yang: gyai ngaui bau" ra" khyo re botung" ke' ra". Ai:thao re yao: wa- Yuda mung" mae na ko" ra" myaung sho" ra" Khristan phung: byu qere bao" thaug' byid: nae" aung lam Alu: ngaui re mabyag maqhag' lo: byid: genae" qhid' mae" yao: wa phung: byu qere mho' ke' ra". Lo" thao" adau jham mae- Korinthu phung: byu qe damyo" wa- yao: re lagyo: apyag' ngad:- ga: qobo zhaug' ta" phoe mung: yao: bam yao" gaung re wa dang man" ra" lagyo: qe ga: ta" ko" ra" mo, re yao" lagyo: aya: we' sin: yang:- ta" vha: yu: ra" dao: jham botung" ke' to" ra".
| Dao: phung"- | 1.1-11 |
| Polu we' Korinthu vogaung: phung:- | 1.12-7.16 |
| Yuda mung" mae na ko" ra" Khristan | |
| phung: byu qe: qhid' mae" Alu: ngaui- | 8.1-9.15 |
| Lagyo: dayaug khyo"- yao" kheim: so' re | |
| Polu ta" vha: ra" dao: jham- | 10.1-13.10 |
| Dao: pin"- | 13.11-13 |
1Mao"So myid o: ru khyo" yang Khristu nho: lagyo: dayaug ngad: ra" ngo Polu we' ngo=nhaung" mao: nhaung: pho" Timothi wa-
Korinthu vogaung: mae na ko" ra" Mao"So: phung: byu qere we' Akhaia mung" geim" mae" Mao"So: byu qe alhab' re Mug sug' tung" ke' ra".
2Ngo=nhaung" pho" Mao"So we' Asang Yesu Khristu wa nhag' myan" ra" je"ju" we' yaug yo: ru nao=nhaung" re shaman" byid: vageshao: wo"-
3Bao" thaug' khyo alhab' re byid' ra" Pho"- nhag' khyag' shogu: ra" Pho"- ngo=nhaung" Asang Yesu Khristu; yao: Pho" ngad: ra" Pho" Mao"So: je"ju" re caung: khin" gelang:- 4Ngo=nhaung" yao: qo" khae: yu va" ra" Mao"So mae" joe" li" ra" bao" thaug' byid' rure ci yang: qug: khai: aja: ja: qhug' ko" ra" mo, re qo" bao" thaug' byid: nae" qhid' mae" Mao"So wa ngo=nhaung" qug: khai: qhug' ra" khyo alhab' mae bao" thaug' byid' ava". 5Ngo=nhaung" wa Khristu kham zo" ra" qug: khai: dayin dayo: myo: sho' re bokham zo" ru we' dakhyo:- Khristu khyo" yang Mao"So nhag' tang" byid' ru rere: bokham: yu: bam va". 6Ngo=nhaung" wa ai: qug: khai: dayin dayo: re kham zo" ru ngad: re ai:ru wa nao=nhaung" nho: bao" thaug' byid' ru we' khyad' yu: ra" khyo qhug' yu nae" qhid' mae" ngad: ra". Bao" thaug' byid' ru re ngo=nhaung" qo" kham: yu: ngad: re wa- nao=nhaung" re: bao" thaug' byid' ru qhug' mung:- ai jham ngo=nhaung" kham zo" ra" qug: khai: dayin dayo: nhag' lam: qhang: ru we' re: qo" zang: kham: ra" qam: so' qo" yu genae". 7Nao=nhaung" wa ngo=nhaung" kham zo" ra" qug: khai: dayin dayo: re bokham zo: vako" ru we' dakhyo:- ngo=nhaung" qo" kham: yu: ra" nhag' tang" byid' ru rere: nao=nhaung" boqo" kham: yu vako" rure ngo=nhaung" ba: ra". Airumung: nao=nhaung" mae ngo=nhaung" nho: myid: lao" ru wa khonhae" re: malaui: malab ngad: ra".
8Mao:nhaung: qe we"- Asia mung" mae ngo=nhaung" khoru" ra" qug: khai: kham zo" lo: ra" khyo ngo=nhaung" nao=nhaung" re ta" peim: kyo: nug: ra". Ngo=nhaung" dao mae kai" jo; ra" qo wa aiqhi" saung" la: yang: kao so' xo' daui: na nae" lhao" re: matho' the' myid ngad: ra". 9Ngo=nhaung" wa shid nae" dao: phyid' qhug' mo, ngad: ra" khyo" yao: yao" gaung re myid: jho: to: va". Ngad qere: ceru: boe" ru wa- ngo=nhaung" nho: qam: re malam mangha lo:- shid: ra" mo, re daui: to" li" nhao: ra" Mao"So re ngo=nhaung" lam ngha nae" qhid' mae" boe" ru ngad: ra". 10Yao: wa airu" ra" gyaug ci" ca" ra" shid gyan nogyan mae" ngo=nhaung" re khyad' yu: ava". Thao rere: Ngo=nhaung" re dam: khyad' yu: li" nae". Ngo=nhaung" wa nao=nhaung" qhid' mae" akyu" bao" mho' byid' ra" khyo" yang ngo=nhaung" re joe" lo nae" ayo, mae dam: khyad' yu nae" qhid' mae" yao: mae ngo=nhaung" myid: lao" na: ra". 11Amung: ngo=nhaung" qhid' mae" myo: sho' akyu" bao" mho' byid' ra" thoe re tau: byid: mung: Mao"So wa ngo=nhaung" re shaman" byid: yang: ngo=nhaung" qo" kham: yu: ra" shaman" je"ju" mathao mae byu myo: sho' mo, wa Mao"So: je"ju" re caung: khin" byid' li" genae".
12Byu: Pha,jhi" khyo" mangad: lo:- Mao"So: nhag' myan" ra" je"ju" qam: so' khyo" yang- ngo=nhaung" ce: mug: myid dao mae kao so' daui: na: au:- je yang: ngo=nhaung" wa nao=nhaung" we' zam" khug: na: ru mae Mao"So: yang byid' ra" nhag' lam: phyu jao dang man" ru de: de: za: jhau: ra" ave, re cao" yang: ngo=nhaung" we' zam" khug: na: bam: ra" khyo re ngo=nhaung" aung khug mae de: de: za: phug nae" khyo jo; ra". 13Nao=nhaung" qo" ba: nghe' mung:- ba: gyo" ra" khyo re za: ngo=nhaung" tung" ke' ra". 14Ngad qere: ana"- nao=nhaung" wa ngo=nhaung" ta" ru dakhyae: dapho za: ba: gyo" ako". Ngad qere: ngo=nhaung" ta" ra" khyo jab sho' nao=nhaung" ba: gyo" li" genae" qhid' mae" ngo myid: lao" ra". Aimung: ngo=nhaung" Asang Yesu Ba Na mae ngo=nhaung" wa nao=nhaung" mathao mae qo" phug mo, ngad nae" ru we' dakhyo:- nao=nhaung" re: ngo=nhaung" mathao mae qo" phug mo, ngad: li" genae".
15Ceru re ngo gyai nhag' lam: nyo, beim: mung:- nao=nhaung" shid' lhang kai" yang: shaman" je"ju" qo" kham zo: genae" qhid' mae" sao qhid' ngo nao=nhaung" re li" qhug' nae" qhid mae" byin seim" pye' va". 16Pe" mung: ga" re- Makedoni mung" khyo ye" lo" zo" mae" nao=nhaung" re vao: qhug' co' yang:- dam: phao: lo phyao: lodam: vao mung: Yuda mung" khyo lo" ra" nga" gyaung: khyo qhid' mae" nao=nhaung" mae" bao" thaug' ru mho' nae"- ein: ngo myid: to"- 17Ceru: seim" to" ra" khyo wa nga" myid atug' akhyug kad' qhu" ru ngad: i? Ngo seim" to" ra" au:- ngoyao" qhid' mae" za: myid yang:- ayo, dalam: mae za: nga" dao: wa ngad:- ga: ta" mung: mangad:- ga: shid' gao ta" ru ngad: i? 18Gaigai: Mao"So wa dang man" ra" dao: re jhau yaug ngad: ru we' dakhyo:- ngo nao=nhaung" re byid' ra" dao: so: re: ngad:- mangad: ga" ra" dao: shid' gao mangad:- 19Pe" mung: ga" re nao=nhaung" phaung mae ngo yao: we' Sila- Timothi kho" kyo" ra" Mao"So: yao: zo: Yesu Khristu wa- ngad: ru we' mangad' ru ga: dalhang: dae ta" yaug mangad:- Yao: wa Mao"So: nho: ngad:- ga" ra" yaug ngad: ra". 20Pe" mung: ga" re Yao: wa- Mao"So: nho: dao: so: alhab' nho: ngad:- ga" ra" atha" ngad: ra". Airu:mung: Mao"So: phung bao bao: thug' li" nae" qhid' mae" Yesu Khristu re khug ngha yang:- Amen ein: ta" na: ru ngad: ra". 21Ngo=nhaung" we' nao=nhaung" re daga" Khristu we' dadang: dalam: za: kao so' daui nhao: ra" yaug wa- Mao"So yao: yao: ngad: ra". 22Ngo=nhaung" re gakai: lai khyin: san: yu mung:- Yao" byu qe khyo" dazid thaung" te' to" ra" yaug we' ngo=nhaung" qhid' mae" yao: zam" to: byid' ra" shaman" je"ju" alhab' qhid' mae" ama, kham: khyo"- ngo=nhaung" nhag' lam: khug mae Gyang" Lho" Byo ke' to: byid: yaug re: Mao"So yao: ngad: ra".
23Ngo Korinthu vogaung: khyo mali" nae" myid: phyid' ru wa- nao=nhaung" qhid' mae" ku yang: ngad: rure Mao"So nga" sagse: ngad: ra". Yao: wa nga" nhag' lam: re ba byid' ra". 24Ngo=nhaung" wa nao=nhaung" pe" re lam khug ca"- ein: ra" khyo re amyin" byid: nae" qam: ke' na: ru mangad:- Nao=nhaung" wa lam khug: ru mae tang tang za: ye; jo, mo, ngad ko" rure ngo=nhaung" ba: ra". Amung: ngo=nhaung" wa nao=nhaung" yao" ngaui bau: khyo qhid' mae" nao=nhaung" we' daga" mau" zaui" na: ru angad:.
