Marku tung" ra" Ngaui Bau" Lau Dao: Gai wa- Mao" So: Yao: Zo: Yesu nho: khyo Lau Dao: Gai ngad: ga" ra" dao: kheim: we' qhid yang: tung" to" ra". Ce: Lau Dao: Gai mae Yesu wa kheim: so' qo" yaug we' lo, joe" zaui: so" ra" yaug ngad: ra" khyo" tung" qhu" to" ra". Yao" nho: kheim: so' re- yao: mho" shid' byid' ra" khyo mae re:- min: yui jham re aung: pye' ra" yao" qam: so' mae re:- byu qenho: qobo jham re khyad' pye' byid' ra" khyo jham mae re: qu" yang: qo" ba: myao: yu: ra". Yesu wa yao" gaung re byu qere qobo mae" loe; beim nhao nae" qhid' mae"- yao: yao" kao so' re byid' pye' nae" joe" li" ra" Mao" So: Yao: Zo: ngad: ra" khyo" ta" ra".
Marku wa Yesu nho: kao so' daui khyo mhomyi: we' sin: yang: yao" nho: mung dao: we' mho" shid' khyo jham re tho' yao: zaui: so" lo: ra" mau" zo" re aqao: to: yang: jao jao de: de: za: tung" qhu" to" ra". Mug sug' tung" yaug wa Babtizam Yohan nhao: khyo- Yesu Babtizam kham: yu: ra" khyo- ju" phyo' ru qhug' ra" khyo jham re lang" ra" khyo" dao: phung" bin: phung" we' dalhang: dae za:- Yesu nho: mho" shid' ra" khyo we' no phyo: gai byid' ra" sasana mau" zo" khyo re tung" qhu" to" ra". Yesu thao cao" ko" ra" mo, wa yao" khyo re zo" mae" je yang: ba: gyo" li" ako". Ngadqere: Yesu nho: gyevo qe wa je yang: gye kad' li" ko" ra". Dao: pin" adau qi: jham mae Yesu nho: lo" thao" laban gyo: kao so' daui: ra" khyo mae boe" ra" khyo jham re we' shid: ru mae" dam: daui: to" li" ra" khyo re akhyag to: yang: tung" qhu" to" ra".
Alhaung" ke' yang: botung" to" ra" dao: pin" shid' lam: wa Marku yang tung" ru ngad: ga: jho: ra" tho' mae gatau dayaug yaug: yang tung" to" ru ngad: ga: dapyae phyo, khyo" myid: jho: yu: ako".
| Ngaui bau" lau dao: aqhid- | 1.1-13 |
| Galile mung" mae Yesu sasana mau" zaui" ra" khyo- | 1.14-9.50 |
| Galile mung" mae" Yerusalem vogaung: khyo- | 10.1-52 |
| Yerusalem vogaung: khug mae we' avai: ayae | |
| mae lo" thao" laban kao so' daui khyo- | 11.1-15.47 |
| Yesu shid: ru mae" dam: daui: to" li" ra" khyo- | 16.1-8 |
| Daui: to" li" ra" Asang gaung na: qhu" byid' | |
| ru we' mug: gaung khyo do, lo" ra" khyo- | 16.9-20 |
1Ce wa Mao"So: yao: zo: Yesu Khristu; nho: khyo Ngaui Bau" Lau Dao: Gai ngad: ra". 2Qu" ge,-
4Aimung: Yohan wa din" pyad' yo mae" thug' li" mung:- Qobo khyad' pye' byid' ru qhug' nae" qhid' mae" myid tha" pye' yang: Babtizam kham: yu ge,- ga: kho" kyo: byid' ru we' Babtizam byid' na: ra". 5Yerusalem vobyu qe alhab' mo, we' Yuda mung" geim" mae" mo, byu qe yao: jhao" ye: mung: yao: yao" qobo jham re lhang: yu: ru we' yao" lo, mae Yodan: gyaung: mae Babtizam kham: yu: ako".
6Yohan wa Gola-u mug' yang qo; ra" mai bau: re ve, mung: shoqid phyid' cui: cui" ci: ra". Yao" zo: ve wa khyag' phaung" we' sayo: byoyhid ngad: ra". 7Alao" Yohan wa Nga" thao re joe" li" nae" yaug wa ngo tho' mae" qam: so' je: bo yaug ngad: ra". Ngo wa yao" khyid zhaung: taui: goe; pheim nae" lao" maman: qi"- 8Ngo wa nao=nhaung" re qid mae Babtizam byid' ra"- Yao: wa nao=nhaung" re Gyang" Lho" Byo mae Babtizam byid' li" nae"- ga: kho" kyo" ra".
9Ai: thao mataung" myao" re Yesu wa Galile mung" Nazaret vogaung: mae" joe" li" mung:- Yohan lo, mae Yodan: gyaung: mae Babtizam kham: yu: ra". 10Qid mae" thug' li" lao" jao" mug: gaung go; bung" li" mung:- Gyang" Lho" Byo wa phaung" kyug' ru: yao" dao mae li" gyo" no" rure yao: myao: ra". 11Ailao" mug:gaung mae" thoe jhau: thug' li" mung:- Nao wa ngo jhid' de; ra" nga" zo: ngad:- Nao re ngo gyai o ngaui: ra"- ga: ta" ra".
12Ailao" jao"- gyang" lho" byo wa yao: re din" pyad' yo khyo jhan" nhao: ke' ra". 13Yao: wa din" pyad' yo mae ba na byid xe geim" Satan yang ju" phyo' ru qhug' ra". Aimae sayo: gug' nyhug' jham re: na: ako". Ngadqere: mug: lagyo: jham wa yao: re li" caung da" byid' ako".
14Aimung: Yohan re thaung: taung" lhaung" pye' thao Yesu wa 15Galile mung" khyo ye: mung:- Ayo, byang" va"- Mao"So: mung" dan: jhao" li" va"- Myid tha" mung: Ngaui Bau" Lau Dao: re lam" ge,- ga: Mao"So: Ngaui Bau" Lau Dao: re kho" kyo" ra".
16Yesu Galile tham: yae mae su" lo" na: ra" au:- ngo: kung" zo: byu Simun we' yao: nhaung: Andre shid' tao geim pye' na: rure myao: ra". 17Ailao" Yesu wa Nga" thao cao" ge,- Ngo naotao re byu kung" byu boe" nhao nae"- ga: yao: shid' tao re ta" ra". 18Ailao" jao" yao: shid' tao wa geim jham re to" pye' co' mung: yao: jhao" cao" ako".
19Dazab zo: ye" lo" tau mae yao: bam: lha dao mae geim pho: na: ra" Zebedi yao: zo: Yaku we' yao: nhaung: Yohan tao re myao: ra". 20Yao: shid' tao re myao we' Yesu khai: ke' ra". Ailao" yao: shid' tao wa yao: pho" Zebedi re okaung jham we' daga" lha dao mae nha: to: co' mung: Yesu jhao" cao" ye" lo" ko" ra".
21Yesu we' yao" mho" zo: qe wa Kaperna-um khyo lo ko" ra". Dug no: ba mae Yesu wa Tarha" Jung Yham khyo vao ye: mung: mho" shid' byid' ra". 22Yao" mho" shid' khyo re the' gyo" ra" mo, byu qe wa gyai mug' byaug: ako". Pe" mung: ga" re yao: wa Tung" Pho" qeru: mangad:- kheim: so' qo" yaug ru: mho" shid' byid' ra".
23Ailao" Tarha" Jung Yham mae bona: ra" makhyang" byo zaung: ra" byu dayaug gyi: hug' mung:- 24Nazaret mae" Yesu we"- Nao we' ngo=nhaung" pe" sin" i? Ngo=nhaung" re lhau: phyo' pye' nae" ein: joe" li" i? Nao khag' ngad: rure ngo ba:- Nao wa Mao" So: gyang" lho" yaug ngad: ra" ga: ta" ra".
25Ailao" Yesu wa Sae za: na wa,- Yao: mae" thug' lo" wa,- ga: ai: makhyang" ra" byo re amyin" byid' ra".
26Ai: makhyang" ra" byo wa yao: re lao" thin: lhang" ke' ru we' zag: hug' mung: yao: mae" thug' lo" ra". 27Mo, byu qe alhab' mug' hao" bam mung:- Ce wa pe" ngad va" i? Pe" ru" mho" shid' khyo asag' ngad va" i? Ceyaug wa makhyang" ra" byo jham re amyin" byid: nae" kheim: so' qo" ru we' yao: amyin" byid' rure yao: bam tae" gyo: ko" ra" ga: yao: cao: jho" ta" ako".
28Ai: lau dao: re Galile mang: geim" gam: sho' mae phyad za: hau" nhao" lo" ko" ra".
29Ailao" Yesu yao" mho" zo: qe wa Tarha" Jung Yham mae" thug' li" mung: Yaku we' Yohan tao we' daga" Simun we' Andre shid' tao: yham khyo vao ye" lo" ako". 30Joe" vao ye: we' Simun: yaug myhi" wa noqam" no mung: yab qo mae koe' jo; rure Yesu re ta" kyo" ako". 31Ailao" Yesu ye: mung: yao" lo; yang yao: re yeshe: to" ke' ra". Ailao" jao" noqam" gai: byaug: ru we' yao: bam re da" zho: da" jhaug' ra".
32Aimung: myi" thao ba vao: cae: yo, joe" lao"- mo, byu qe no phyo: qhug' mo, alhab' we' yui zaung: ra" mo, alhab' re Yesu jhao" jhui" li" ako". 33Vobyu qere: alhab' mo, yham kheim: mae li" zang" ham: na: bam: ako". 34Alao" Yesu wa no phyo: aja: ja: qhug' ra" mo, myo: sho' re gai byid' ru we' yui myo: sho' rere; khe' khyo" pye' ra". Yao: wa yui jham re dao: jhau nae" akhang" mabyid: ngad: ra". Pe" mung: ga" re yui jham wa yao: khag' ngad: rure ba: ako".
35Thao: ba ne,seim mug: bo" myi: re Yesu to" mung: cae: tae" ra" dajo, qo mae akyu" yemho' na: ra". 36Simun we' yao" byin cao: qe wa Yesu thao cao" qho: ye: mung:- 37Qho: myao lao" alhab' mo, nao re qho: na: ako"- ga: ta" kyo" ako".
38Ngad qere: Yesu tau: mung: ce: lhang" gam: vogaung: jham maere: ngo qo" kho" kyo: nae" qhid' mae" gatau: vogaung: jham khyo ngo=nhaung" ye: gelang:- Ai: qhid' mae" ngo joe" li" ru ngad:- ga: ta" ra".
39Amung: yao: wa Galile mung" geim" jao: sho' du" qin" mung: Tarha" Jung Yham jham mae cao" kho" kyo" ru we' yui jham re khe' thug' pye' ra".
40Ailao" mao gae: de; ra" byu dayaug Yesu jhao" li" ra". Yao: wa Yesu qhid' kheim: mae pad' thaug' thaug' mung:- Nao nug: re wa ngo re qo" gyang" shao: lo" nhao byid: zai ngad: ra"- ga: yao: re mho' ra".
41Yesu wa nhag' gyo" khyag' ru we' yao" lo, yheim" ke' mung: yao: re zaui" ci zo" re" Ngo nug:- Gyang" shao: lo" se, ga: ta" ra". 42Ailao" jao" mao gae: gai: lo" mung: gyang" shao: lo" byaug: ra". 43Yesu wa yao: re jhaug' za: zug' nhao mung: cekhyo re khag' rere: pe" data" kyo:- Lha" wa,- 44Ngad qere: khin jaung pho" jhao" ye: mung: ni" gaung re yeqhu" wa,- Amung: mo, byu qe: qhid' mae" nao gyang" shao: lo va" khyo sag se: doe, vashao:- Moshe amyin" to" ra" ngaui" xeim: re xeim: lo" ngaui" byid: wa,- ga: ta" mung: phyad za: lo" nhao: ke' ra".
45Ngad qere: yao: wa thug' ye" lo" mung: ai: khyo re qam: ke' ta" kyo" ru we' lau dao: hau" nhao" ke' ra". Airumung: Yesu wa vogaung: khug khyo de: de: za: magai: vao ye: lomung: vovai: voyae mae na: ra". Khyi" khao: ngo" mae" mo, wa yao: jhao" li" ako".
