Mathe tung" ra" Ngaui Bau: Lau Dao: Gai wa Yesu wa dao: so: we' sin" ra" khyad' yu: Asang ngad mung:- dao: thang" axug' mae Mao"So: yang yao" byumyu" re byid' to" ra" dao: so: re jab byang" li" nhao: ra" yaug ngad: ra" khyo lau dao: gai re ta" na: ra". Ce: lau dao: gai wa Yesu khau: li" mung: na: qi" li" ra" Yuda byu qe: qhid' mae" za: mangad:- mug: myid byu alhab' mo; qhid' mae" re: ngad: ra". Mathe wa ce: Lau Dao: Gai re jid' jid' naug naug nyang" za: tung" to" ra". Yao: wa Yesu khau: li" ra" khyo we' qhid mung:- Babtizam kham: yu: ra" khyo- ju" phyo' qhug' ra" khyo- aithao Galile mung" mae mung dao: kho" kyo" ra" yao" sasana mau" zo" khyo we' no phyo: gai byid' ra" khyo re tung" to" ra".
Ai:thao Yesu Galile mung" mae" Yerusalem khyo ye" ra" gyaung: khyo- lo" thao" dalaban mae boe" ra khyo jham- pyao: zang dao mae jin" se' pye' ru qhug' ra" khyo we' shid: rumae" dam: daui: to" li" ra" khyo jham re tung" xam" to" ra". Ce: Lau Dao: Gai wa Yesu re Mao"So: nho: Kham" To" Ra" Tarha" re ta" pheim: sho' kyo: byid: nae" kheim: so' qo" ra" qi" qhang: ra" Mho" Pho" ngad mung:- Mao"So: mung" dan" khyo re mho" shid' byid' ra" yaug ngad: ra" khyo" tung" qhu" to" ra". Yesu nho: mho" shid' khyo jham re khyo ajhaung ngo" ja: mae tung" zhang: ke' to" ra". Ai jham wa (1) Mug gaung: mung" dan" byuzo: qenho: ave, lo, mau"- vin vo; ca" ra" qo jham- akho: akhang" jham we' joe" nae" bin: zang khyo we' sin: yang: ta" ra" bam dao mae" tarha" kho" dao: (5-7). (2) Mho" zo: daxe: shid' yaug re sasana mau" zo" qhid' mae" mho" shid' byid' ra" khyo (10). (3) Mug: gaung Mung" dan: khyo we' sin" ra" dao: tau" jham (13). (4) Mho" zo: doe; ra" khyo lajheim: re mho" shid' byid' ra" khyo (18). (5) Ana" ce: pyad qae: mae" thao" lo" nae" khyo we' Mao"So: mung" dan: joe" li" nae" khyo we' sin: yang: mho" shid' byid' ra" khyo jham ngad: ra".(24-25).
| Yesu Khristu khau: li" ru we' yao" byuxag' | 11-2.23 |
| Babtizam Yohan zaui" ra" sasana mau" | 3.1-12 |
| Yesu Babtizam kham: yu: ru we' ju" phyo' qhug' ra" khyo | 3.13-4.11 |
| Galile mung" mae Yesu sasana mau" zaui: so" ra" khyo | 4.12-18.35 |
| Galile mung" mae" Yerusalem khyo | 19.1-20.34 |
| Yerusalem avai: ayae mae Lo" thao" dalaban gyo: | |
| mae mau" zaui" ra" khyo | 21.1-27.66 |
| Shid: rumae" dam: daui: to" li" ru we' Asang yao" | |
| gaung re na: qhu" byid' ra" khyo | 28.1-20 |
1Ce:ru wa Abraham we' Davi myid: zo: Yesu Khristu; byu xag' ngad: ra".
2Abraham wa Isak re- Isak wa Yaku re khau mung:- Yaku wa Yuda tao ho' re khau: ke' ra". 3Yuda myi: Tama mae" Phared we' Zera tao re khau: ra". Phared wa Hezrum re khau: mung Hezrum wa- Aram re khau: ra". 4Aram wa Aminada re- Aminada wa Nasun re- Nasun wa Salmun re khau: ra". 5Salmun myi: Rahab kham: mae" Bua re khau: ra". Bua myi: Rutha mae" Obed re khau mung:- Obed wa Yese re khau: ra". 6Yese wa Davi Kho:kham re khau: ra". Davi wa Uria yham sang myhi" mae" Sholamon re khau: ra". 7Sholamon wa Rehobom re- Rehobom wa Abia re- Abia wa Asab re khau mung: Asab wa Yosaphat re khau: ra". 8Yosaphat wa Yoram re- Yoram wa Uzia re- Uzia wa Yotham re khau: ra". 9Yotham wa Ahad re khau mung:- Ahad wa Hezekia re khau: ra". 10Hezekia wa Manase re- Manase wa- Amon re- Amon wa Yosia re khau: ra".
11Babelon mung" khyo jeim kad' nae" taung" jhui" lo" ra" ayo, mae Yosia wa Yekhonia tao ho' re khau: ra".
12Babelon mung" khyo jeim kad' nae" taung" jhui" lo" thao re Yekhonia wa Salathila re- Salathila wa- Ze=ru=ba=bela re khau: ra". 13Ze=ru=ba=bela wa- Abiu re- Abiu wa- Eliakim re- Eliakim wa Azura re khau: ra". 14Azura wa Zadok re- Zadok wa Akhim re- Akhim wa Eliu re khau: ra". 15Eliu wa Eliaza re- Eliaza wa Mathan re- Mathan wa Yaku re khau: ra". 16Yaku wa Mari yham sang pho" Yoseb re khau ra". Mari wa Khristu ga: mhang" ra" Yesu yao: myhi" ngad: ra".
17Ai mung: Abraham mae" Davi Kho:kham pyad joe" sho' byu xag' daxe: byid xag'- Davi Kho:kham mae" Babelon mung" khyo jeim kad' nae" taung" jhui" lo" ra" pyad joe" sho' byu xag' daxe: byid xag'- Babelon mung" khyo jeim kad' nae" taung" jhui" lo" ra" pyad mae" Meshia pyad joe" sho' byu xag' daxe: byid xag' ngad: ra".
18Ana" Yesu khau: li" ra" khyo wa ceru: ngad: ra". Yao: myhi" Mari wa Yoseb: yang lo,xo' yu nae" mho' to" ra". Yao: shid' zo: daga" mazam" na shi: re Mari wa Gyang"lho" Byo: yang gaung la" li" ra". 19Yao" yham sang pho" Yoseb wa din: man" ra" byu dayaug ngad mung: Mari re qho' maphyo' nhao nug yang: yao: re sae za: kao" pye' nae" myid: na: ra". 20Ngad qere: yao: ce khyo re myid qu" na: ra" au: Qu" wa,- Asang: Mug:Lagyo: dayaug yab, mo, mae yao: re li" qhu" byid: mung:- Davi yao: zo: Yoseb we"- Mari re lo,xo' yu nae" dagyaug, wa,- Pe" mung: ga" re yao: gaung la" li" ru wa Gyang"Lho"Byo: yang ngad: ra". 21Amung: yao: wa yaug gai nau" khau: li" nae" ngad:- Nao wa Yao: re Yesu ein: mhang" byid: zai ngad: ra". Pe" mung: ga" re yao: wa- yao" amyu" re yao: bam: qobo mae" khyad' yu: li" nae" ga: ta" ra".
22Ceru alhab' wa lapa: nhad' khyo" Asang ta" to" ra" dao: jab byang: li" nae" qhid' mae" boe" lo: ra". 23Ai: Lapa dao: wa Qu" wa,- Zomyi: gyang" dayaug wa gaung la" li" mung: yaug gai nau" khau: li" nae" ngad:- Yao: re Emanuela ga: mhang" li" ganae" ngad: ra". (Emanuela ga" ru wa Mao"So ngo=nhaung" we' daga" na: ga" ru ngad: ra").
24Yoseb yab: myhid' jo; ru mae" so" li" mung:- Asang: Mug:Lagyo" yang Yao: re amyin" byid' ru we' dakhyo: kad' mung: Mari re lo,xo' yu: ra". 25Ngad qere: yaug gai zo: re makhau khau wa Mari we' mazam" na ngad: ra". Amung: Yoseb wa ai: yaug gai zo: re Yesu ga: mhang" byid' ra".
