Johan laikuat a veithumnak hi, “Pawlpi upa,” in Gaius tihmi Pawlpi lamhuaitu lakah a kuatmi hi. Laingantu pa'n Gaius cu Khristian dangte a bop hangin a humah lungdam thu hilh hi. Mahten Diotrefes tihmi pa khi ngaalling un tin thucah hi.
| A Sung Ummi Thu | |
|---|---|
| Thu tawpatnak | (1-4) |
| Gaius pahnak | (5-8) |
| Diotrefes lawl hi | (9-10) |
| Demetrias lungkim pihnak | (11-12) |
| Thu tawpnak | (13-15) |
1Pawlpi upa keimah in ka ihzetmi Gaius na lakah hi laikuat hi ngan ing hi. 2Ka ihmi ka ngualcam, dam no in na um theihnak tukin le ihempoh tuah khua thuzet in na um theihnak tukin, nangma ca thungen ing hi. Hawvang lam ah dam no in um ci tih thei ing. 3Nang cu thutak sungah a um lelengmi nahih bangbokin thutak sungah teimazet in na umnak thu Khristian unau pawl ten hilh in ka lungdamzet ing hi. 4Ka cate thutak sungah nung uh ci tihmi thu ka theih saangin, keimah lungdam tiiktu thudang um ma toh hi.
5Ka ihmi ka ngualcam, na Khristian pih unau tei ca naa nadeh ten na theih awng ngawlmi a hi ta vang in, teizet no in dek ci. 6Itnak na neih daan hi Pawlpi tei lakah son zo haw toh hi. Mailam a hawh haw tuk laih mi lampi ah vang Pathian lungdam zawngin bawm hih in hi. 7Itahimtitale Khrih nadehnak lampi a pat haw ten um ngawltu tei lakpen imah la ngawlin pan haw hi. 8Mahhangin thudik sung aa a nadehnak haw ah, telbok tukin oh Khristian pawl in nasiazet in bawm tuk hung hi.
9Pawlpi tei lakah lai comno ngan ing hi. Mahnaven hotu a nuammi Diotrefes cun ka hilhmi cu imamah in sial tuk ma hi. 10Mahhangin ka hen leh ten a bawlmi hempoh phuang leh tung hi. Eimu thu siazet in a sonmi le zolthu a son mite langlehtiik khawng tung hi. Mahbek hei hi ma laih hi. Khristian unau pawlte a zin haw ten zin tun tuk awi ngawlin tun inn a hon nuam mite hei khi kham in, mahmi pawlte Pawlpi pawleu ah hawlvawk tukin heh tin zuam hi.
11Ka ihmi ngualcam pa aw, a pha ngawlmi cung pahsun, a phami cung saw in, a phami a bawltu pawpoh cu Pathian ta hi. A pha ngawl a bawltu pawpoh cu Pathian mu ma hi.
12A kuakua hei hihen Demetrias paak haw hi, thutak ngangai in paak haw hi. Eimuh vangin mahmi cu a theihpihmi uh hi, ka hilhmi uh hi a maanmi hi tih thei ci.
13Thu hilh tuk tampi nei ing, mahnaven laikung le laitui tuah ngat tuk cun deih ngial mang. 14Zin leh paih tukin ngaisung ing, mahten cangcianzet in hilh leh tung hi.
15Daihnak na humah um ta hen. Na ngualcam ten nuksat haw hi. A ngualcam uh te pumpaak tekin nuksat sak in hi.