Hi laikuat hi Paul in Rom pawlpi tei lakah a kuatmi hi. Paul amah cu Rom khua pawlpi tei lakah a zin nuam hangin a zinnak lampi sial ham tukin a cahhamnak lai hi. A tuptah daan cu mahlai Khristian pawl tei lakah dawmlai na dek ta in amuh tei bopnak tuah Spain ah hawhnom vawk tuk khi hi.
Khristian upnak thu le mah upnak thu khi Khristian tei nunnak ah sullam nei in itibang nunpih thei tuk tihmi ama theihnak bang hilh ciang nuam in a ngatmi lai hi. Hi laibu sungah Paul in a hilhmi a thupi hempoh cangkim zet in um hi.
Rom khua aa pawlpi te a nuksat dan le amu ca in thu a ngetsak dan thu te a hilh ceng ten Paul in a laikuatmi ii tuptahbelmi, “Pathian in amah le mihing tei laklawh ah itibangin lemnak bawl him tihmi langtiik hi. Mahmi cu apat penpan a tawpnak tian upnak hangin hi,” tihmi khi hilh hi (1.17).
Mahten Paul in a thu sihsatmi cangkim zet in langtiik hi. Judah mi hihen, Gentail mi hihen, mihing hempoh Pathian tuah lemdun tuk kul hi. Itahimtitale a venghawng uh in sualnak nuaiah a ummi ngeh hung hi. Mihing te cu Jesuh Khrih upnak hangin Pathian tuah lemdun tiikmi hung hi. Mahnungten Pathian tuah a pehzom thaknak uh pen a piangmi Khrih tuah nun langkhatnak nunthak thu khi hilh hi. Umtute cu Pathian tuah lemdunnak nei in sualnak le thihnak nuai pen Pathian ii Hawvang in luattiik zo hi. A ngeng 5-8 sungah Paul in umtu tei nunnak sung aa Pathian Daan le Pathian Hawvang ii huham tumtahnak thute hilh hi. Mahcengten Pathian in mihing tei ca in a ngaihsutsami sungah Gentail le Judah miphunte itibangin tum langkhat thei haw tuk him tih thu hilh hi. Judah miten Jesuh Khrih a nialnak te vang minam hempoh ca in Pathian ii tuptahnak cu pakhat ahih bangbok in Judahte vang cun nialvawk thei hihim haw tuk ma hi tih thu hilh hi.
A dawlbelnak ah Paul in Khristian nun hi itibangin nun tuk tih thu son hi. A thu pi belin midangte tuah phialdunnak ah itibangin nung tuk tih thu ngan hi. Hite hi Pathian ii nadeh hi tin tawpan in Khristian ten uktu acozah humah dehvo a neih uh zia, pakhat le pakhat laklawh ah dehvo a neih uh zia le sia le pha khen thiam theihnak tuah pehdun in thudotnak tevang hi a lai ngatmi in hilh ciang hi. Pathian thangphatnak le pumpaak thuhilhnak tuah in a laikuat cu tawptiik hi.
| A Sung Ummi Thu | |
|---|---|
| Thu tawpatnak le thu sihsan | (1.1-17) |
| Mihing tei nunpatnak a kul dan | (1.18-3.20) |
| Khrih sung aa nunthaknak | (5.1-8. 39) |
| Pathian ii thu tuptahnak sung aa Israel | (9.1-11.36) |
| Khristian pawl tei ziaza | (12.1-15.13) |
| Thu tawpnak le pumpaak nuksatnak | (15.14-16.27) |
1Khrih Jesuh ii sal le Pathian in a Thuthangpha phuangtu tukin a sammi le a tenmi nungzuitu keimah Paul in lai kuat ing hi.
2Lai Thiangtho sung aa a ngat bangin mah Thuthangpha cu Pathian in a kamsang tei lakah a tepsami hi. 3Mah Thuthangpha cu a Capa a Topa uh Jesuh Khrih ii thu cungcang hi, mihing ahihnak lam pecun David casuan sung pen a suakmi hi. 4Pathian ahihnak le a thianthonak lam ah, thihnak pen thawhtiik ahihnak hangin Pathian Capa ahihnak cu a nasiazetmi huham tuah in langtiik zotoh hi. 5Khrih Amah hangin mi hempoh ten saangin a thu a zui theih hawnak tukin Pathian in nungzuitu hihnak covo keimah pia hi. 6Noh Rom khua aa a um mitevang Jesuh Khrih ta hi tukin Pathian ii sammi ah a tel mite hi bok uh ci.
7Mahhangin Rom khua aa a um Pathian ii ihmi le ama mihingte hi tukin a sammi na venghawng uh lakah hi laikuat hi ngan ing hi.
A Pathian uh le Topa Jesuh Khrih hehpih ningnatnak le daihnak cu nohtei lakah um zaal tahen.
8Jesuh Khrih ii hangin leihum buppi ah na upnak thu uh a khang ahih taak na venghawng uh ii ca in ka lungdamnak thu Pathian lakah hilh masa ing hi. 9Ama Capa ii Thuthangpha cu ka lungmu hempoh tuah hilh in a na ka deh mite cu maan hi tin Pathian in theihpih hi. Thu ka nget sial ten nangmuhte phawkngil awng mang tih cu Pathian in thei hi. 10Pathian in lem atitale veikhat beek nangmu lakah zin leh thei tukin Pathian ama lakah ngen leleng ing hi. 11Itahimtitale nangmuh te thazaang kho tiiktu tukin Pathian ii Hawvang laksawng na co theih boknak tuk uh in nangmuh tei lakah zin nuam zet ing hi. 12Mahtin ka tih ten keima upnak in nangmu upnak thakhotiik in nangmu upnak in keima upnak thakhotiik bok tuk ka tihnak hi.
13U le naute hihi cing leleng un, vei tampi nangmu lakah zin tukin tumli zo ing hi, mahnaven a i te hangin him a zin tul suak thei ngawlin a khaktu um leleng thong hi. Gentail mitei lakah thin thekmi ka umtiik theih bangin nangmu lakah vangin thinthekmi a um thei a hin tih deihzet ing hi. 14Itahimtitale mi hempoh lakah in deh tuk vo leiba nei ing hi; miciip le misil lakah hihen, laithiam le thiamngawlmi lakah hihen leiba nei ing hi. 15Mahhangin Rom khua aa a um nangmu lakah vang Thuthangpha phuang tuk cu ngak hel mahtak ing hi.
16Thuthangpha cu zahcaak pih hihim mang hi; Itahimtitale Pathian ii huham hangin umtu hempoh ten nunpatnak ngah haw hi. A masa cun Judah mitei caa hi, mahten Gentail mitei caa hei hi bok hi. 17Itahimtitale Pathian in Amah le mihing tei laklawh ah itin lemnak bawl him tih khi langtiik in; mahmi cu a patnak pen a tawpnak tian upnak hangin hi. Lai Thiangtho vangin “Upnak hangin Pathian tuah a lemdunmi cu nung haw tuk,” tin ti hi.
18Pathian ii thin-uuknak cu van hum pen mihing tei sualnak le phat ngawlnak hempoh humah in lang hi; mahmi mihing tei phat ngawlnakte cu thumaan theihtheihnak tuk a khaktute na hi haw hi. 19Pathian ii cawhkuan tawk haw hi, itahimtitale Pathian Aman a theih ciangtiik zo bangin mihing tei Pathian theihtheihnak cu ciangzet in lang zo hi. 20Pathian in hi leipi a bawl penpan muh theih ngawlmi a nundan hihen, kumkhua in a neihmi huham le Pathian ahihnak zia hihen ciangzet in muh theihmi na hihi.Pathian ii thil bawl mitei hum pen muh theih hi. Mahhangin kuamah in pha thei haw tuk ma hi. 21Pathian cu thei leng haw hi; mahnaven maizahnak le upatnak pia haw ma hi; a humah lungdam thu hei hilh haw ma hi. A ngaihsutnak haw cu imah ngawl cang khawng in a lungmu hawmhol pi haw cu khuathimnak tuah in dim hi. 22Ciip ung tin ti duncopli haw naven misil hi haw hi. 23Kumkhua nungmi Pathian bia saw ngawlin a thi theimi mihing, vano, ngamsa le a bokvak ngamsate bangin bawlmi zukte saw khi bia haw hi.
24Mahhangin mahtihbang mihing ten a lungmu sung haw aa, a bawl nuam haw thil nawngkai ningdelhhuai nate bawl tuk cun Pathian in kham nuam ngawlin hahzau hi. Mahten zahcaakhuai nu le pa sualnak te bawl haw hi. 25Pathian ii thudik le thumaan cu zolthu in thek haw hi; Siamtu Pathian ai in a seemsuah cop mi mihing saw tei na dek in bia haw hi. Siamtu saw khi kumkhua in biak tuk mi hi. A men.
26Hitihbangin thil a bawlnak haw hangin Pathian in mihingte cu a zahcakhuai mi amu tisa nopnak sungah hengtiik hi. Numeite hei in numei ahihnak na khi a daanbang mang ngawlin, daan tin hei nei ngawlin numei le numei sual haw hi. 27Mahbangbok leng in pano te vang cun numei tuah pawldunnak zamin a tisa deihnak haw hangin pano le pano sual haw hi. Pano ten pakhat le pakhat mahtihbang zahcaakhuai thil sual a bawlnak haw hangin a thaman haw cu amu humah heng hi.
28Hitihbang mihing ten Pathian thudik cu a lungmu sung haw ah cencihtiik a nuam haw ngawl hangin lungmu nawngkainak sungah Pathian in hengtiik hi. Mahhangin bawl tuk ngawl nate khi bawl haw hi. 29Amuhte cu siatnak, phatngawlnak a phunphun le hampumnak, suaksualnak namkim tuahin dim haw hi. Halhsiknak, mithahnak, dodunnak, mizolnak le huatdunnak, awklawlnak tuah in dim haw hi. Muuk le kam tam in, pakhat le pakhat sonsia dun haw hi. 30Pathian ii mitkem zawng in nungin, ngaallin, pualthau in, mah le mah pahcawi copin phatngawlnak bawl tukcun lampi a phuphun zei in nu le pa tei thu ngai nuam haw ma hi. 31Asia le apha khen thiam theihnak lungmu nei ngawlin a kamtiam hawte zui leh ngawlin midang caa hehpihnak le deihsaknak imamah nei haw ma hi. 32Hitihbang a nungca pawlte cu thihtaak hi tin Pathian ii daan piakmi um tihvang thei haw hi. Mah ii humah hitihbang thil pha ngawlte amuh rori in a bawl haw bek sial ngawlin midang tei bawl ten vang in lungkimpih haw hi.
