Biakinn Sak natu A kipia Letsongte

¹David Kumpipa in a kikhawmte theampo tungah,“Ka tapa Solomon sia Pathian teal sa hi, ahihang ama sia khangmoi lai a, a heakna tawm lai hi. A nasep tusia mihing omna kumpi inn hi ngawl a, Topa Pathian om natu Biakinn sa tu ahikom nasia mama hi. *29:1-2 1Khang 22:5. ²Ka hi zawkza in Biakinn sak natu vanhte— kham, ngun, tau, thik, thing, suangmanpha le suangkaang, a hoi sakna suangnam tatuam le marble te ka khol siat zo hi. ³Hi ka khol sa vanhte bek dom ngawlin Pathian Biakinn atu ka dei sak manin keima aituam kham le ngun tam mama zongh ka pia hi. ⁴Biakinn pangte zep natu in kham phabel ton 115 le ngun ciitak ton 265 le ⁵khut thiamte ii vawt tu nate theampo atu ka pia zo hi. Tu in akua in Topa tungah dei sakna taw pia lai tu nu ziam?” ci hi.

⁶Taciang be le phung lutangte, minam uliante, ngalkap lampuite le kumpi neisa vanh cingte a ukte in, ⁷Biakinn sak natu in a nuai ah vanhte kham ton 190, ngun ton 380, tau ton 675, le thik ton 3,750 pia uh hi. ⁸Suangmanpha neite in Biakinn sum kholna Gershon be le phung Levi minam Jehiel ii a uk Biakinn vanh kholna ah pia tek uh hi. ⁹Mihonpite in lawpna taw tazata a tam vanh Topa tungah lungkim takin a piak thei sia lungdam uh hi. David Kumpipa zongh a lungdam peuma hi.

David in Pathian Pok

¹⁰David Kumpipa in mihon mai ah Topa pok hi. Ama in, “Ka pu Jacob ii Topa Pathian awng, a tawntung a tawntung in nang kipok tahen! ¹¹Nang sia a vaanglian, a minthang, a patak huai le a tuanngen na hi hi. Leitung vantung ah a om theampo nangma aa hi a, nangma sia leitung vantung a ukpa na hi hi. *29:11 Mt 6:13. ¹²Hauna le maanna theampo nangma kung pan hong pai hi a; na vaangletna le na thahatna taw na theampo na uk a; vaangletna le thahatna sia a kuama po tungah na pia thei hi. ¹³Tu in ka Pathian awng ka lungdamnate kong ko uh a na minthang kong pok uh hi.

¹⁴“Ahitazong kei le ka mite in a tatakin bangma kong pia thei bua uh hi; banghangziam cile na theampo nangma ii nong piak hi a, nangma tengma kong pia kik bek uh hi. ¹⁵ Topa awng, nong heak hi a, ka pu le ka pate uh bangma in nuntakna lampi ah saltangte le khualmite bangin a vakthapte ka hi uh hi. Ka nuntakna uh sia leitung ah nilim bang hi a, thina pan ka suakta thei bua uh hi. ¹⁶ Topa kote Pathian awng, na min thiangtho pok natu Biakinn khat sak natu in hi vanhte theampo ka khol siat zo uh hi; ahihang tuate theampo sia nangma kung pan hong paite veu hi a, a vekpi in nangma aa ahi hi. ¹⁷Khat tek ii thin sung na ze-et a, thumaan thutang a neite tungah nang na lungdam hi ci sia ka he hi. Thumaan thutak le thinsung takpi taw hi vanhte theampo kong pia zo hi, taciang hi munah hong kikhawm na mite in nang kungah biakpiakna hong paipui sia bangza in lungdam ziam ci sia ka mu zo hi. ¹⁸Ka pu ka pa uh ahi Abraham, Isaac, le Jacob ii Topa Pathian awng, tabang thinsung sia nangma mite thin sungah kho sak in a nangma atu in a muanhuaite ahi thei natu in keamcing tawntung in. ¹⁹Na thupiakte a vekpi in a zui zawk natu le a sak tu a, hi bangin ka kingin khol biakinn sia a sak natu in ka tapa Solomon thin le lung sungah uuk takpina hong piak sak tan,” ci hi.

²⁰Taciang David in mihonpite tungah: “ Topa na Pathian pok vun!” ci in thupia hi. Mihonpite in Topa a pu a pate Pathian pok uh a, amate a lu uh kun in Topa zatakna pia uh a kumpipa zongh upatna pia uh hi.

²¹A zing ciang amate in biakpiakna in a ngannote ngo in Topa tungah aap a, tua zawkciang, a neak tu in mihingte tungah pia uh hi.Tua dom ngawlin amate in khuital tulkhat, tuutal tulkhat le, tuuno tulkhat te sia biaktau tungah meihal biakpiakna in pia uh hi. Amate in zu biakpiakna in paipui uh hi. ²²Tua ni in amate sia Topa mai ah anne tuidawn in lungdam ngualnuam in om uh hi.

Amate in Solomon sia kumpi in a nii veina thang sak uh hi. Topa min taw amate in Solomon sia amate a uk tu in sathau noai a, Zadok sia thiampi seam sak uh hi. ²³Tabangin Topa ii a kip sak kumpi tokhum tungah a pa David taangin Solomon to hi. Ama in a cialcing kumpipa khat hi a, Israel mite theampo in a thu ni uh hi. *29:23 1Kum 2:12. ²⁴Uliante theampo le ngalkapte le David ii tapa dangte theampo ngangawn in Solomon Kumpipa tungah kong thumaan tu uh ci in kamciam pia uh hi. ²⁵Solomon sia a ngam buppi in kiita a, Israel a uk kumpi theampo sung pan Topa in a min thangbel kumpi suak sak hi.

David ii Ngam ukna A tom

²⁶Jesse tapa David in Israel ngam buppi sia, ²⁷kum sawmli sung uk hi. Ama in Hebron khua pan kum sali sung uk a, Jerusalem khua pan kum sawmthum le kum thum sung uk hi. *29:27 2Sa 5:4-5; 1Khang 3:4. ²⁸Ama sia sumhau le ngual ii zatak mama hi a, a khan haam mama zawkciang thi a, a tapa Solomon in a kumpiza lua hi. ²⁹David Kumpipa ii tangthu sia a kipat pan a tawpna dong in kamsang thumte ahi, Samuel, Nathan, le Gad ii tangthu khumnate sungah kikhum hi. ³⁰A ngam ukzia, vaang a neizia, ama tungah a piang thu le la theampo le Israel le a kiim a paam ngamte tungah a piang thute theampo sia tua tepteena laibu sungah cing takin ki at hi.